Su 28 de Sant’Andria sinzat su 70° annu dae sa disparrida de Enrico Fermi, unu de sos iscientziados pius influentzes de su XX seculu e una figura de fundamentu in s’istoria de sa fisiga de su tempus nostru.

Po tzelebrare custa affussione importante meda, s’iscrittore sardu Andrea Pau at pubbricadu su libru (Enrico Fermi – su geniu atomigu), un’opera chi gratzias a una contassia originale e nova, torrat a biere sa vida istravanada e sas iscopertas iscientificas de su fisigu italianu. Andrea Pau at seperadu unu puntu de vista unicu po contare sa cumplessidade e sos effettos de sa vida de Fermi, affidandesi a battoro pessonas de fantasia chi faghent cun s’iscientziadu in sos momentos detzisivos de s’esistentzia sua.

Custas pessonas mustrant atterettantos puntos de bista po mesu de sos cales Pau intritzat sa contassia istorica e cussa romanzada, faghinde diventare su libru atzessibbile e ammaghiante po sos lettores pius zovanos. S’iscrittura de su libru est bistada su fruttu de unu tribagliu de iscuadra cadriu meda. Andrea Pau est bistadu azzuadu dae Martina Sala, editor in Book ona a Tree, e Federico Taibi, editor de sa domo de imprenta Gallucci.

De fundamentu est bistadu puru su contribbudu iscientificu de su Proffessore Vincenzo Barone, mastru de Fisiga Teorica a s’Universidade de su Piemonte Orientale e connoschidore mannu de s’opera de Fermi. Sa vida de Enrico Fermi est intritzada in manera istrinta cun paritzos momentos de sos pius importantes de su Noighentos: dae sa fisiga nucleare a sos isviluppos de sa bom a atomiga, passande po su contribbudu suo a sa revolussione iscientifica. Pau at tribagliadu po acciappare un’echilibriu intre sa fidelidade istorica e sa contassia romanzada.

No est solu unu donu a unu de sos iscientziados pius mannos de s’istoria, ma puru un’istrumentu po accostare sos zovanos a s’iscentzia e a sa connoschentzia de su passadu. Su libru resessit a contare una pessona istravanada e sas iscopertas suas in manera atzessibbile, chentza perdere de bista sa cumplessidade de su cuntestu istoricu e iscientifficu.

Cun cust’opera, Andrea Pau torrat a su pubbricu suo unu retrattu de un’omine chi, mancari si siat movidu in su campu de s’eccellentzia iscientifiga, at dassadu un’eredidade chi binchet sos limides de sa fisiga po influentzare in manera funguda su mundu in su cale bivimos a dies de oe.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

In su coro de s’arta Gaddura, in Tempio Pausania, si acciapat unu museu chi est unu cascione de istoria e arte, accasazzadu in s’ex istazione de sos trenos de sa tzittade. Custu logu ammaghiat sos bisitadores cun sa capatzidade sua de che los giughere in daesegus in su tempus passadu, a sos annos ’30, gratzias a sa tennica de vraicu e a sas pinturas de Zuseppe Biasi, unu de sos pius mannos pintores sardos de su 1900.

S’ispantu beru si agattat artziande sa mirada a sas pinturas de Zuseppe Biasi, chi adornant sas barras ‘e muru de sa sala. Custas operas, chi si podent biere chentza pagare, affigurant iscenas de sa vida de donzi die e de sa campagna de sa Sardigna, cun feminas cun sos bistires de su connottu, massajos chi tribagliant in sos campos, e unu zovanu chi sonat s’organittu. Sas pinturas formant unu frisu chi inghiriat sa sala, faghindela divennere unu logu carrigu de cultura e de connottu.

Fatta in su 1930 e accabbada in solu deghe meses, sa decorassione pintada de s’istazione mustrat s’unica opera pubbrica de Biasi chi su pubbricu podet biere. Sas pinturas sunt cunsideradas una cona de sa tzittade e bogant a fora s’ammirassione de collesionistas e istudiantes de s’arte. Biasi at dadu su contribbudu po creare unu movimentu artisticu sardu modernu, ispirande medas artistas locales cun s’istile suo riccu de ambiente e particularidades.

In mesu de sas curiosidades ligadas a su museu bi est sa disparida prena de misteru de una pintura,”Sas feminas chi pigant su caffè”, chi est capitada in su mentres de sos tribaglios de accontzu. Cussa pintura non est mai bistada acciappada, lassande solu unu boidu supra sas barras ‘e muru de sa sala e addescande unu contu locale chi faeddat de una possibile fura.

Oe, mancari sa linia de sa ferrovia de donzi die non siat pius attiva, s’ex istazione torrat a bida donzi beranu e istiu gratzias a su Trenu Birde, chi torrat a passare in su percursu originale dae Tempio a Palau. Sos visitadores si podent gai affundare in d’unu biazu chi ammentat su passadu, in mesu de arte e istoria, crischiande s’ammaju de una Sardigna attesu meda in su tempus.

S’ex istazione de Tempio Pausania est pius de unu museu: est unu logu inube istoria, arte e memoria si fundent, mantenninde bivu s’ammentu de unu tempus, po mesu de sa bellesa de sas operas de Biasi e su ligonzu cun s’antiga linia ferroviaria de cussu logu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22