Sa ghia autonoma at segudadu unu puntu de arrivu istravanadu, ispinghindesi a fugas mai toccadas innantis supra una macchina de filera.

Unu robot-pilotu novu meda, isviluppadu dae su Politecnico de Milano in collaborassione cun su tzentru Natzionale po sa Mobbilidade Agguantabile, at istabilidu su novu record de 285 kilometro a s’ora ghiande una Maserati MC20 Coupè. Tottu custu est sutzessu supra sa pista de s’aeroportu de s’aeronatica Militare de Piacenza San Damiano, cando bi fit una neula fitta e chentza chi bi esseret nemancu un’omine supra sa macchina.

Custu risurtadu mustrat unu passu in daenanti de importu in sa chirca e in s’isviluppu de una ghia autonoma, mustrande comente sas macchinas chentza autista potant oberare in sicuresa puru in cunditziones urtimas. Sa Maserati MC Coupè, usada est una macchina de filera, e custu faghet divennere su risurtadu fintzas pius de signifficu, pro itte mustrat su potentzale de sa tecnologia applicada a modellos chi sunt a disposissione po meda zente.

Sa truma de su Politecnico de Milano chi at fattu custa porfia no est sa prima borta chi faghet cosas istravanadas. Giai binchidore de paritzas cumpetissiones internatzionales de ghia chentza autista, sa truma tenet fintzas su record de fuga po machinas chentza autista: 309 kilometros a s’ora, record de su 2022 cun d’una macchina de proa in su Kennedy Space Center de sa Nasa, in Florida. Custu mustrat una chirca contina de s’eccellentzia e una capatzidade de novidade proponinde cosas novas chi che giughet s’Italia in mesu de sos primos in su mundu po sa mobilidade abbista.

S’intentu de controllare sa ghia autonoma a fuga gai manna est doppiu. Dae una parte permittit de controllare su comportamentu de su “robo- driver” in situassiones laccaneras, faghindelu cunfrontare cun cunditziones chi non si agattant in sa vida de donzi die. Dae s’atteru, permittit de faghere naschere tecnologias chi podent mezzorare sa siguresa e sa balentia e sos assentos de ghia chentza autista mancari siat a fugas pius bassas. Su “robo-piloto” est bistadu giai proadu cun sutzessu puru a fugas pius bassas.

Su robo-piloto est bistadu gia proadu cun sutzessu a fuga dae Codice de sas Carrelas in su mentre de sas garas. Mille Miglia 2023 2 2024, mustrande seguresa e pretzisione.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna, unu modellu novu de continuidade aerea approbadu dae sa Cummissione.

Sa Cummissione Guvernu de s’Iscrocca de su Cunsizzu Regionale,ghiada dae Roberto Li Gioi(M5S), at dadu parrere arrimaderu a maggiorantzia, cun su tzentru dresta chi no at votadu, a su modellu novu de continuidade aerea chi est bistadu proponnidu dae sa Giunta Todde.

Pustis de aere intesu s’assessore a sos carrares Barbara Manca, su testu at a torrare cras in Giunta e at essere luego mandadu a su Mit po sa frimma de su decretu e po  essere pubbricadu in sa Gazzetta Uffitziale de s’Unione Europea. S’intentu est est de pubbricare su bandu intre su 29 de capudanni po faghere partire su serviziu novu dae  s’istiu 2026.

Sa continuidade at a durare battoro annos e at a tennere battoro fascas a die invetze de sas tres de como, pius frecuentzias, su controllu de sa disponibilidade cun sa possibilidade de azzunghere atteros bolos pagados dae sa Regione e cun tariffas pius bassas: su Casteddu-Roma po andare e torrare at a minimare dae sos 147 a sos 100 euros, cun atteros abbasciamentos de su 30% po sos piccioccos sutta de sos 14 annos e chentza pagare nudda po sos pizzinnos fintzas a sos duos annos chentza logu po si setzere. Sa numeru de chie at a tennere benefitzios at essere pius manna e at  incrudere militares,tribagliadores chi bistant in Sardigna,isportivos chi faghent parte de sotziedades isulanas, zente chi no bistat in Sardigna ma tenet parentes fintzas a su terzu gradu, chie tenet sa lezze 104 e sos tutores legales de sos chi istant in Sardigna.

In su bandu at essere cunsiderada menzus s’offerta tennica chi cussa accolomica po garantire sa calidade de su servitziu e bi at essere puru una cabbina de regia e unu controllu supra sa mobbilidade de s’iscrocca po regulare in donzi momentu sa continuidade nova. Sa porfia como po sa Sardigna at essere de traduire custa novidade in d’unu servitziu chi siat balidu e firmu abberu, capatze de rispondere a sas esigentzias de sos sardos e binchere sas crititzidades chi dae annos accumpanzant su dirittu a sa mobilidade de s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22