Sos affatzistas de Fridays for Future ant ghettadu un’appellu dae su coro a sa Regione Sardigna, mustrande affuscu po su seperu de imbestire in sa retza de ispartidura de su metanu.

Mancari siat bistadu abbandonadu su progettu de s’ischina manna de su metanu, s’initziativa de fraigare una retza locale poi ispartire est cunsiderada dae sos attivistas comente unu pranu a sa mattessi manera dannosu meda po s’ambiente e sa sustenibilidade in su tempus longu de s’isula.

Sa dimanda insoro a sa Giunta de sa Regione est crara: torrare a biere sos pranos energeticos e abbratzare cun detzisione sa colada a sas energias annoabiles. Su seperu de sa Giunta regionale de sighire in s’andala de sas amministratzione passadas, narant sos attivistas, mustrat una mancantzia de bisione subrasseida in daenanti a sa netzessidade semper pius apprettosa de unu cambiamentu detzisu in sa diressione de unu modellu energeticu chi si potat sustennere.

Sa Sardigna, tenet un’opportunidade unica de si ponnere comente esempiu de cambiamentu ecologicu in su Mediterraneu, ma po faghere custu depet puntare supra s’energia chi si podet annoare e supra progettos chi puntan a minimare sas bogadas de gas serra, no a las faghere divennere pius mannas.

S’usu de su metanu, chi calicunu cunsiderat menzus de su carbone, no est bidu dae sos attivistas comente una solutzione chi est menzus. Custu pro itte, narant, sas bogadas cumplessivas produidas in custu protzedimentu, dae cando si nde bogat, a cando si consumat, sighit a peorare sa situassione de su clima chi bi est giai oe. Donzi imbestimentu pubbricu po su metanu benit cunsideradu dae Fridays for Future comente un’isperdissiu de dinari.

Su movimentu evidentziat puru chi su seperu de puntare supra su metanu no at a battire beneffissios beros a s’accolomia de sa Sardigna. S’accreschimentu de s’importu de su gas, difattis, no at a faghere atteru chi faghere creschere sa dipendentzia de s’energia de s’isula dae istados chi medas bortas tenent guvernos autoridarios, minimande sa capatzidade de sa regione de isfroscare un’autonomia de s’energia chi siat fundada supra s’annoabile.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22