In su coro de s’arta Gaddura, in Tempio Pausania, si acciapat unu museu chi est unu cascione de istoria e arte, accasazzadu in s’ex istazione de sos trenos de sa tzittade. Custu logu ammaghiat sos bisitadores cun sa capatzidade sua de che los giughere in daesegus in su tempus passadu, a sos annos ’30, gratzias a sa tennica de vraicu e a sas pinturas de Zuseppe Biasi, unu de sos pius mannos pintores sardos de su 1900.

S’ispantu beru si agattat artziande sa mirada a sas pinturas de Zuseppe Biasi, chi adornant sas barras ‘e muru de sa sala. Custas operas, chi si podent biere chentza pagare, affigurant iscenas de sa vida de donzi die e de sa campagna de sa Sardigna, cun feminas cun sos bistires de su connottu, massajos chi tribagliant in sos campos, e unu zovanu chi sonat s’organittu. Sas pinturas formant unu frisu chi inghiriat sa sala, faghindela divennere unu logu carrigu de cultura e de connottu.

Fatta in su 1930 e accabbada in solu deghe meses, sa decorassione pintada de s’istazione mustrat s’unica opera pubbrica de Biasi chi su pubbricu podet biere. Sas pinturas sunt cunsideradas una cona de sa tzittade e bogant a fora s’ammirassione de collesionistas e istudiantes de s’arte. Biasi at dadu su contribbudu po creare unu movimentu artisticu sardu modernu, ispirande medas artistas locales cun s’istile suo riccu de ambiente e particularidades.

In mesu de sas curiosidades ligadas a su museu bi est sa disparida prena de misteru de una pintura,”Sas feminas chi pigant su caffè”, chi est capitada in su mentres de sos tribaglios de accontzu. Cussa pintura non est mai bistada acciappada, lassande solu unu boidu supra sas barras ‘e muru de sa sala e addescande unu contu locale chi faeddat de una possibile fura.

Oe, mancari sa linia de sa ferrovia de donzi die non siat pius attiva, s’ex istazione torrat a bida donzi beranu e istiu gratzias a su Trenu Birde, chi torrat a passare in su percursu originale dae Tempio a Palau. Sos visitadores si podent gai affundare in d’unu biazu chi ammentat su passadu, in mesu de arte e istoria, crischiande s’ammaju de una Sardigna attesu meda in su tempus.

S’ex istazione de Tempio Pausania est pius de unu museu: est unu logu inube istoria, arte e memoria si fundent, mantenninde bivu s’ammentu de unu tempus, po mesu de sa bellesa de sas operas de Biasi e su ligonzu cun s’antiga linia ferroviaria de cussu logu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Mario Pes: sa Sardigna contada po mesu de sa mirada de s’arte fottograffica.

Merculis 18 de frearzu su SEARCH de Casteddu at avviadu una mustra dedicada a Mario Pes, frigura tzentrale de sa fottograffia sarda de su Noighentos, capatze de fundere dilighesa artistica e asserva sotziale. Sa mustra sinzat su cuccurale de su disignu incumintzadu in Nugoro in S’Ispatziu Ilisso e isfroscadu in sos urtimos meses cun abbenimentos editoriales e cun films, chi ant ghiradu s’attentzione de sa critiga e pubbrica supra unu mastru de sa cultura bisiva isulana.

Intitulada “Mario Pes. Sa Sardigna intre connottu e modernidade”, sa mustra apparat una bista de mandu supra sa tzittade de Casteddu e s’iscrocca sua,repessados po mesu de s’obbiettivu de un’artista chi revertiat donzi iscena de sa die in cumposissione bisiva.

Prus de 200 friguras, medas in mesura manna, ghirant logos de sa tzittade e de sas lacanas, caras, architetturas e logos de tribagliu cun d’una fortza poetica chi andat prus a daenantis de sa simple documentassione. Donzi fottograffia est unu resumene de geometria, lughe e aera, un’echhilibriu intre castiada reale e bisione de bellesa. Sa fottograffia de Pes mi movet donzi mamentu supra s’affrontadura intre arte e cronaga.

Sa mirada sua abbizosa a sas tesones sotziales de sa tzittade, divenit limbazu bisivu, capatze de ghirare s’umanidade e operosidade chi animant sa Sardigna de s’incumintzu de su Noighentos. Importantzia particulare tenet su contu de sos logos de tribagliu, incluidinde s’esperientzia de sas feminas, ghirada cun delicadesa e rispettu, chentza discursos ma chin seru artisticu fungudu.

S’allestimentu, curadu dae s’architetto Antonello Cuccu,amplariat sa fortza poetica de sas friguras e cumbidat su bisitadore a s’affundare in su logu fottografficu, a si firmare e attibbire sa mesura de sa bellesa de sos logos fottograffados dae Pes. Sa mustra prevedit bisitas ghiadas, buttegas didatticas e devuccamentos po accumpanzare su pubbricu in d’unu caminu chi faghet attibbire e chi est prenu de cultura fintzas a su 4 de aprile 2026.

Po accabbare s’esperientzia, su docufilm iscrittu e setadu dae Enrico Pinna, torrat in daesegus sa coerentzia artistiga e s’indipendentzia de su pensamentu de su fottograffu intrintzinde sa muda pessonale e s’istoria cumone.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22