In s’ispidale de Chieti est bistadu fattu un’interventu istravanadu e delicadu meda, chi at giuttu a che bogare unu bugnu de grandesa desamplada, de 30kilos, da una femina de 75 annos.

Sa femina, chi bistat in sa provintza de Chieti, ma benit dae un’istadu de s’Unione Europea, fit andata a su Prontu Succursu de s’ispidale, ca teniat dolores mannos a sa entre e una creschida manna de su volumene de sa entre, cosa chi aiat fattu divennere netetzessariu unu controllu lestru. Sos esamenes appena fattos, aiant giai evidentziadu sa presentzia de una massula in s’ala de su bassu entre, ma solu a su momentu de s’interventu sos silugianos ant pottidu biere canto su bugnu fit mannu.

S’interventu est bistadu fattu dae su ginecologu Alessandro Lucidi e dae sos duttores de Ginecologia e Ostetricia de s’ispidale de Chieti. Bida sa mannaria de sa massula, si est teppidu faghere un’interventu abberinde sa entre, lassande sa tennica cun su Robot Da Vinci, chi si impittat cando si operat po sos bugnos. Sa massula occupaiat una parte manna de sa entre e poniat problemas po sos movimentos in su mentre de s’operassione, faghinde divennere s’operassione delicada e meda cumplicada, mescamente po a’arriscu de faghere dannos a sos organos chi bi sunt a lacana. In pius de che aere bogadu sa massula, sos duttores li che ant bogadu s’urba e sas ovajas e ant leadu fintzas campiones chi serbint po chircare de cumprendere de calu bugnu si trattat e a bitte puntu fit sa maladia.

S’operassione est un’ esempru de eccellentzia de sa sanidade e de s’azzudu de sos divressos campos, in d’unu tzentru chi dae annos si dedicat a sa ghia in daenanti de sos casos de bugnos in sa ginecologia. S’equipe de Ginecologia e Ostetricia de Chieti, cun s’azzudu de sos ispidales de Ortona e Chieti, in sos urtimos 12 meses ant acciappidu e curadu pius de 60 casos de bugnos a sa entre, una de sas maladias pius fittianas de s’inginnu femininu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22