A sa passizzada coberta de su bastione de Saint Remy, unu de sos logos pius ammajosos de Casteddu, bi at essere s’edissione de iberru de sa “Grande Jatte”, un’abbenimentu chi ponet impare cultura, istoria e connottu.

Cust’annu, su tema seperadu est “Tzelebrande sa Bohème”, unu donu a Giacomo Puccini po su chentenarju de sa morte sua. S’opera sua “La Bohème”, mustrada po sa prima borta in su 1896, at essere su filu po conduire una die affundada in sa situassione de sa Belle Epoque. S’abbenimentu at incumintzare a sas 11 cun s’abbertura a su pubbricu. Gratzias a sa partetzipazione istravanada de s’Assotziu Giuseppe Verdi de Monserrato, sos bisitadores ant essere accollidos dae aeras famadas de s’opera de Puccini, interpretadas dae tenores e tiplis de talentu mannu.

Sa sala po su tè apparitzada dae su Caffè De Candia, at a faghere de curnisa a custas mustradas, chi ant a revocare sa galanza e sa delicadesa de sa fine de s’Ottichentos, carrande sos presentes in d’unu viazzu in daesegus in su tempus. A rendere meda pius istravanada sa situassione at essere sa musica dae su bivu de sa truppa de arcos Orchestars, formadu dae dischentes zovanos de sas iscolas de musica de s’ala de Casteddu, impare a musicistas proffessioneris. Custu cumplessu at accumpanzare puru su Gran Ballo di Chiusura, donande a sos partetzipantes unu momentu de maghia.

Addia a sa musica e a s’intertenimentu, s’abbenimentu at a offerrere paritzas attividades a tema. Sa sperta de maneras bonas Elenora Cabras at a faghere una lessione dedicada a sas maneras bonas de cussu tempus, mentres Lady Marion at a ghiare sos cumpanzos in sos ballos proprios de sas salas de ballus de s’ottichentos, cun lessiones de introdussione abbertas a tottus.

Sa Grande Jatte non potiat mancare de tzelebrare s’aera de Nadale, bida s’accurtzesa a s’8 de Nadale, die in sa cale po su connottu, s’incumintzat s’istagione de sas festas. Po cussu, tottu at essere arricchidu dae sa presentzia de sos Glee’s, chi ant a proponnere una regorta de nadale ispirada a su connottu inglesu.

Commente dae su connottu, no ant a mancare sos momentos classicos de sa Grande Jatte: sos cuncursos po sos menzus bistires, custa borta ispirados a su gustu bohèmien, sa mustra mercadu de maistros e hobbistas e sos artistas de carrela.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Miraculu meigu in su Brotzu: mama e fizu salvados dae una rara infetzione chi los podiat faghere morrere.

Un’operassione meiga desamplada, fatta in s’ispidale Brotzu de Casteddu, at permittidu de salvare una femina zovana raida e su pitzinnu suo dae un de sas infetziones pius graves e raras chi siant mai bistadas rescontradas in sa ginecologia. Sa solutzione, cunsideradu unu casu sanidariu de importantzia mondiale, est bistada pubbricada supra sa Rivista de grandesa iscientifica Case Reports in Women’s Health.

Sa femina, una zovana casteddaja raida dae solu doighi chidas, est arrivada a s’ispidale in cunditziones disisperadas: un’infetzione chi la podiat furminare, unu cuadru de animia grave e una cumplicassione rara meda- una granchena ispabina- poniant a arriscu in pagu tempus sa vida sua e de su pizzinnu. S’operassione in sa parte de Ginecologia de su Brotzu at mustradu unu momentu importante po sa meighina de su tempus nostru, no solu po sas difficultades de su casu, ma po sa prontesa e sa pretzisione cun sa cale est bistadu accomettadu.

A sa base de su cuadru sanidariu bi fit sa “Sindrome di Fournier”, una maladia grave meda chi faghet morrere impresse meda sa petta modde, e chi corpat de pius sos omines che i sas feminas. In custu casu, sa cumparfida sua in andantzia fuit una emergentzia bera chi no si connoschiat, acchessada dae un’atteru problema chi teniat dae prima, sa carentzia de globbulos biancos, chi faghiat divennere s’organismu de sa femina meda debile.

Gratzias a unu atzertamentu de sa maladia lestru e coidau, sos duttores ant potidu faghere a sa lestra un’operassione chirugica de livellu artu meda. S’operassione est bistada controllada dae su proffessore Antonio Macciò, gavacciu de Ginecologia e Ostetricia a s’universidade de Casteddu e direttore de sa Ginecologia Oncologica de s’ispidale Businco, su tribagliu de su team , in su cale bi fuint mastros de partu, silugianos, istudiosos de su sambene e ispecializzados in s’istudiu de sa pedde modde, at permittidu de frimmare s’infetzione e affortigare sas cunditziones de sa malaida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22