Su caffè, una bera e propria cona de sa cultura italiana, est po accomettare un’atteru aumentu de su pretziu, chi tiat podere fittare meda supra de sos costumes de donzi die de miliones de pessonas. In sos
urtimos tres annos, su pretziu de unu caffè est creschidu de su 15%, faghinde pigare su pretziu mediu in su tzilleri a casi 1,50 euros. Intames, sas prenettas narant chi in sos meses chi ant a bintrare custa tzifra at a podere arribare a casi 2,00 euros, po more de paritzos fattores chi sunt cumplicados meda.

Unu de sos motivos printzipales dipendet dae s’aumentu de su pretziu de su caffè birde, chi serbit po produire “s’espresso”, chi est suggetta a unu cambiu de sos pretzios meda fatzile. Custu inclinu a s’aumentu de su pretziu, chi non si fit mai bidu prima, est poninde sutta de pressione tottu sa filera de su caffè, dande problemas non solu a sos chi lu produene ma puru a chie lu buffat.

Sa situassione est puru pius cumplicada dae problemas de assentu in tottu su mundu. Sa firmada de su Canale de Suez, at aumentadu sas difficultades, faghinde accreschere su costu de sos imbios e allonghiande sos tempos po sa integras. Custa disgrassia at evidentziadu sa debilesa de sas lineas de approvistamentu de su mundu, giai proadas dae atteros motivos, commente sas ispeculatziones. A dies de oe, su pretziu de su caffè birde est arrivadu a 245 tzentesimos podonzi libbra, un’aumentu de su 66% cunfrontadu a s’annu prima e pius de su doppiu cunfrontadu a tres annos faghet. In mesu de sos motivos bi est su cambiamentu de su tempus, chi minettat de minimare de su 50% sos terrinos chi si podent contipizare dae oe a su 2050. Sos abbenimentos urtimos de su tempus, commente s’abba chi proet commente unu trainu in Brasile e sa siccagna in su Vietnam, sunt giai teninde un’effettu devastante supra sa produssione de caffè in tottu su mundu, creande problemas de disponibilidade e pretziu de su prodottu.

In su mentres de sos duos annos 2022/2023, sos pretzios de produssione de Illy caffè sunt aumentados de su 17%, ma sa favrica at chircadu de agguantare medas de custos costos, faghinde pagare a sos consumadores solu 1/3 de s’aumentu. Custu at fattu aumentare sospretzios.

Attività realizzata col contributo della Regione Sardegna — IMPRENTAS
2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22