Dae su 9 de austu, s’istravanadu talentu de Manuela Mameli si bocat a campu in d’unu chirriolu novu chi arricchit sa bista musicale. Dispostu supra sos printzipales logos digitales, su singulu “I twill become”, pubbricadu dae s’insinza romana AlfaMusic, naschida in su 1995, mustrat un’atteru abbenimentu in sa carriera de s’artista de s’Ozzastra, deffinida dae medas riccas esperientzias internatzionales e dae sos riconnoschimento retzidos.

Manuela Mameli no est unu numene novu in su mundu de su jazz. Cun d’unu curriculum chi cumprendet duas istagiones in sas cales at giuttu su jazz italianu e sardu in Cina intre su 2016 e su 2019, Mameli at partetzipadu a duos giros cun Orchestre Filarmoniche chi l’ant bida mustrandesi in sos teatros intre s’Asia e s’Europa.

In su 2017 at binchidu su premiu Hengel Gualdi a su Festival de sas zuras metropolitanas de Bologna e in su 2016 est bistada finalista a su premiu Andrea Parodi cun d’unu disignu chi faghiat faeddare su jazz e sa musica sarda. Custu disignu, presentadu fintzas a su European Jazz Expo, est arrivadu intro de sa Tesi de Laurea Magistrale cun laude in s’iscola de musica de Santa Cecilia de Roma.

Su sero de su 14 de austu, Mameli at battidu s’urtima creatzione sua supra de su cataffale prenu de grandesa de s’Arabax, accisande su pubbricu cun sa capatzidade sua de fundere animas musicales divressas. “I twill become” est unu chirriolu chi disaffiat sas convenias, ligande modernidade e connottu in d’unu intretziu de pop e jazz. Sa cantadora iscumbattat fundales novos, isperimentande cun atza, ma chentza mai segare su ligonzu cun sas raighinas suas de su jazz.

Mameli no est nova a bardanas in su mundu de su pop, una zenìa cun sa cale est creschida e chi at iscumbattadu puru in s’iscrittura de sa limba inglesa. Mancari s’elettronica siat printzipale, Mameli at cherfidu intregare duos istrumentos tipicos de sa traditzione musicale sarda, acciappande po issos unu logu naturale in sa musica. Custos sonos, chi po issa sunt familiares e istintivos meda, sunt tessidos in sa trama musicale in manera de creare unu ponte intra sas raighinas suas e sa bista artistica de sos tempos de oe.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Mario Pes: sa Sardigna contada po mesu de sa mirada de s’arte fottograffica.

Merculis 18 de frearzu su SEARCH de Casteddu at avviadu una mustra dedicada a Mario Pes, frigura tzentrale de sa fottograffia sarda de su Noighentos, capatze de fundere dilighesa artistica e asserva sotziale. Sa mustra sinzat su cuccurale de su disignu incumintzadu in Nugoro in S’Ispatziu Ilisso e isfroscadu in sos urtimos meses cun abbenimentos editoriales e cun films, chi ant ghiradu s’attentzione de sa critiga e pubbrica supra unu mastru de sa cultura bisiva isulana.

Intitulada “Mario Pes. Sa Sardigna intre connottu e modernidade”, sa mustra apparat una bista de mandu supra sa tzittade de Casteddu e s’iscrocca sua,repessados po mesu de s’obbiettivu de un’artista chi revertiat donzi iscena de sa die in cumposissione bisiva.

Prus de 200 friguras, medas in mesura manna, ghirant logos de sa tzittade e de sas lacanas, caras, architetturas e logos de tribagliu cun d’una fortza poetica chi andat prus a daenantis de sa simple documentassione. Donzi fottograffia est unu resumene de geometria, lughe e aera, un’echhilibriu intre castiada reale e bisione de bellesa. Sa fottograffia de Pes mi movet donzi mamentu supra s’affrontadura intre arte e cronaga.

Sa mirada sua abbizosa a sas tesones sotziales de sa tzittade, divenit limbazu bisivu, capatze de ghirare s’umanidade e operosidade chi animant sa Sardigna de s’incumintzu de su Noighentos. Importantzia particulare tenet su contu de sos logos de tribagliu, incluidinde s’esperientzia de sas feminas, ghirada cun delicadesa e rispettu, chentza discursos ma chin seru artisticu fungudu.

S’allestimentu, curadu dae s’architetto Antonello Cuccu,amplariat sa fortza poetica de sas friguras e cumbidat su bisitadore a s’affundare in su logu fottografficu, a si firmare e attibbire sa mesura de sa bellesa de sos logos fottograffados dae Pes. Sa mustra prevedit bisitas ghiadas, buttegas didatticas e devuccamentos po accumpanzare su pubbricu in d’unu caminu chi faghet attibbire e chi est prenu de cultura fintzas a su 4 de aprile 2026.

Po accabbare s’esperientzia, su docufilm iscrittu e setadu dae Enrico Pinna, torrat in daesegus sa coerentzia artistiga e s’indipendentzia de su pensamentu de su fottograffu intrintzinde sa muda pessonale e s’istoria cumone.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22