Pustis de aere attesu meda, sa passizzadda lignea de s’Almiragliadu, unu de sos caminos pius bellos e amados de Casteddu, at torradu a abberrere a su pubbricu.

Custu trettu, chi partit dae su molu Ichnusa fintzas a Su Siccu, rugrat logos de importu mannu commente sa Marina Militare, sa parte de daesegus de su liceu iscientificu Alberti, Su Parcu Nevi e Sant’Elia. Sa tzerimonia de abbertura at bidu sa partetzipassione de medas autoridades locales e tzittadinos prenos de galabera, accabbande cun sa secada de sa vetta.

S’abertura at marcadu sa congruida de unu disignu importante po su balorimentu, chi at ghiradu a sa tzittade unu logu de fundamentu po sos chi istimant sas passizzadas accanta a su mare. “Oe est una die distinta po Casteddu ,” at nadu Natale Ditel, segretariu generale de s’Autoridade de s’Assentu portuale, in su mentres de s’abbenimentu. “Torramos a sos tzittadinos sa passizzada de s’Almiragliadu, unu bene pretziosu meda chi torrat in finis a disposta de tottus. Po nois, de s’Autoridade de Assentu, est unu die importante meda.”

Su protzessu longu de ammodernamentu est incumintzadu in su mese de capidanni de su 2022, cando s’Autoridade Portuale at cummissionadu un’interventu de accontzadura istravanada. S’appamentadura de linna, guastada dae su tempus passadu, teniat bisonzu de operas de faghere in presse. Bell’e gai, in su mentres chi si faghiant sos disignos, est bessidu a pizu chi non bastiaiat unu accontzu simple: sa detzisione duncas est ù bistada de torrare a faghere a nou su molu.

Sa serrada de su caminu, dae su mese de Santu Aini 2023, at permittidu a sos tennicos de tribagliare in manera devuccada, cambiande tottu s’istruttura de linna cun taulas de linna de tek. Fintzas sos cantos de athariu chi agguantant su molu, sunt bistados fattos a nou, affiantzande pius firmesa e sicuresa. Oe, sa passizzada partit dae Calada Roma fintzas a Su Siccu,arrugande medas de sos logos cun sa menzus bista de sa tzittade. Su caminu como est riservadu solu a sos chi andant a pe, commente istabilidu dae unu pregone cabidianu, chi proibbit de passare a sas britzicchettas e monopattinos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22