S’attora Caterina Murino at detzisu sas dies passadas de si ponnere a sa banda de chie est cuntra s’ispeculatzione de su bentu in Sardigna, partetzipande a sas protestas ordiminzadas dae sas delegassiones locales.

Mancari bi siat bistadu s’interventu de sa polizia de deris sero, chi at liberadu sa zura in su portu , sas delegassione chi sunt cuntra s’ispeculatzione non si sunt dassados dirrenare. Si sunt torrados a accorrare un’attera borta po firmare sos camions chi che sunt leande sos cantos de sas turbinas eolicas fora de su portu de Aristanis, mustrande determinu e unidade.

Sa truma de sos chi ant bogadu a campu su problema, mancari esseret prus pagu manna de sas dies passadas, at mustradu unidade e arrotzadura istravanada. In mesu de sos chi bi fint, sa famada attora de Casteddu Caterins murino chi at acciappadu s’attentzione de sos media e de su pubbricu. In sas dies passadas, Murino aiat giai espressadu a tottus, sa contrariedade sua a s’ispeculatzione de s’energia e a s’istallatzione de sas turbinas po su bentu in su mare de sa Sardigna, ghettande un’appellu a sa Presidente de sa Regione, Alessandra Todde.

Sa presentzia sua a sa manifestassione l’ant bida commente un’atteru sinzale de s’importantzia e de s’apprettu de su thema.

Caterina Murino, connoschida a livellu de tottu su mundu po s’attividade sua de attora, at usadu sa notoriedade sua po faghere creschere sa boghe de sas delegassiones locales. In d’una resonada fatta dae pagu, at declaradu: “ Ponnere chena capu perunu turbinas eolicas est una minetta, non solu po s’ambiente naturale de s’isula nostra, ma fintzas de s’identidade culturale e de sa bista nostra. Teppimos acciappare solutziones po s’energia chi pottant essere abberu agguantadas e tenzant rispettu po s’mbiente nostru”.

Sa partetzipazione de Murino a sas protestas est unu sinzale claru de s’opposissione chi est creschinde cuntra chie cheret ponnere turbinas eolicas in Sardigna. Medas chi bistant in Sardigna e chi faghent affatziu, bient custas installatziones commente una minetta po s’ambiente e sa bista sarda, chi est appretziada po sa bellesa sua sintzera.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22