Pro more de sas istrampadas ruinosas chi sunt sutzessas in s’Ardia de Sedilo, in provintza de Aristanis, duos caddos sunt mortos e casi deghe sunt sutta de osservatzione. Custa manifestatzione de su connottu, chi est una cursa de biolera e periculosa meda a caddu, si faghet donzi annu su 6 e su 7 de triulas. S’organizassione Interntaztionale Protessione de sos animales (OIPA) at annuntziadu chi in pagu tempus, at a presentare una dimanda po biere sos documentos po connoschere menzus itte est sutzessu e at puru nadu chi si at a riservare sa possibilidade de faghere denuntzias in sos logos opportunos.

“Ammos connoschidu custa tragica nova e pensamos chi manifestatziones de custu tipu teppant essere superadas in su numene de una tziviltade etica e zuridica pius manna, rispettande puru s’articulu nou de sa costitutzione n.9, chi tutelat puru sos animales”, at nadu s’OIPA. “In custu ammentu de su passadu, sos cavalleris s’iscappant a currere in d’unu camminu iscaffadu e scangagliadu a tottu fuga, poninde a chimentu sa vida de sos caddos. Est arrivadu su momentu de che la finire, una borta po tottus cun su connottu betzu commente custu.”

Sigundu s’OIPA, abbenimentos commente s’Ardia de Sedilo, su Palu de Siena e atteras bogadas a campu commente custas, sunt un’”ispettaculu” chi non si podet atzettare, una cosa chi appartenet a su passadu chi ponet in perigulu sos caddos e puru sos cavalleris. “Basta Palu, Bastat Quintanas, bastat Giostras usande sos caddos supra arringas chi no andant bene: garas chi non tenent pius resone de esistire in d’unu tempus in su cale creschet e si affortigat una sensibilidade, poderada puru dae sos orientamentos de sa zustizia, chi no agguantat malusantzia supra sos
animales”.

S’OIPA, in pius, evidentziat chi s’attuamentu po sos dirittos de sos animales, est aumentande semper, ispinta puru dae sos orientamentos novos de sa zustitzia, chi riconnoschent su bisonzu de diffendere sos animales dae cale si siat forma de bisestru. Sa violentzia e sos arriscos assotziados a custas manifestassiones de su connottu, non si podent pius atzettare in d’una sotziedade chi si mezzorat po tennere semper pius rispettu de sa vida e su benessere de sos animales.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22