Unu fiottu de istudiantes de s’Universidade de Casteddu, ant creadu una barca de classe Moth, fatta tottu canta de materiale ecologicu. Custa barca moderna, giammada Mariposa, est su risurtadu de su tribagliu de s’UniCa Sailing Team e at essere posta in mare chenapura 14 de lampadas a sas 18.00 in s’Anfiteatro de Marina Piccola in Casteddu.

Pustis de essere posta in mare, Mariposa at a navigare in sas abbas de su lagu de Garda, inube at a partetzipare a sa cumpetissione internatzionale de grandesa SuMoth Challenge, chi si at a faghere s’urtima chida de lampadas in Malcesine. Custu abbenimentu ponet impare barcas fattas dae sos istudiantes chi arribant dae sas universidades de tottu s’Europa.

Sas barcas de sa classe Moth, sunt de sas pius ispettaculares e modernas de su mundu de sa vela. Custas barcas si connoschent po s’insoro istravanada velocidade e po sa capatzidade de bolare subra s’abba, gratzias a una carena a “idroplano” (foiling). In su mentres de sa navigassione, su Moth si nde pesat dae s’abba, minimande sa resistentzia e aumentande sa cursa in manera chi impressionat meda.

S’UniCa Sailing Team, s’isquadra de sa vela de s’Universidade de Casteddu est ghiada dae Flavio Stochino, inzenieri e chircadore de s’uffitziu de Inzenieria Tzivile, de s’Ambiente e Progettu(Dicaar). S’isquadra est fatta dae 65 istudiantes mascros e feminas chi arribant, non solu dae sos cursos de laurea in Inzenieria e Progettu, ma puru cussos de Iscienzas de s’Accolomia, Legales e Politicas e Istudios de s’umanidade.

S’ ammanniada po sa cumpetissione SuMoth Challenge est bistada cadria e at dimandadu meses de tribagliu tostu. Sos istudiantes ant teppidu accomettare paritzas disaffias tennicas e de apparitzada, ma s’impignu insoro est bistadu premiadu cun su crompimentu de una barca chi est a daenanti, in linia cun sos fundamentos de sustentu de s’ambiente.

S’intrada in mare de Mariposa at essere unu abbenimentu de signifficu, chi at essere pius distintu po sa presentzia de sa marrina Dalia Kaddari, campionessa de atletica. S’intzidida sua mustrat s’importantzia de s’isport e de poderare s’ambiente, balores chi s’UniCa Sailing Team at ischidu intregare in su disignu sou.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22