Sa prella cuada de sa costera de Villaputzu, posta intro de su poligunu de s’esercitu de Sartu de Quirra, una de sas plajas pius ermosas de su Mediterraneu, est torrada accantzaditza.Intames, su permissu at a balere solu fine a su 30 de capidanni.

Sa plaja de Murtas, unu de sos logos pius bellos e ammaghiantes de sa costera de sa Sardigna, abberit s’intrada dae terra. In sas dies chi ant a bennere, ant essere attrippidas sas isulas pitticcas po regollere s’arga differentziada, e a su centru de sa plaja bi at essere una zura inube si at a podere andare cun sos animales de cumpanzia, commente at nadu s’amministratzione de su comune de Villaputzu, po unu discursu, ligadu puru a s’incluidividade chi at fattu partetzipare sa comunidade de Villaputzu.

Villaputzu, una prenda pitticca de sa Sardigna, est connoschidu po sas bellesas naturales suas e sa plaja de Murtas est unu esempru perfettu. Custu trettu de costera, longu 6 kilometros, est deffinidu dae sa rena crara a ranos medios e russos, imparis a pedras pitticcas allisiadas dae su mare, e orizadu dae coddos de rena chi si affacant supra sas abbas cristallinas de unu colore biaittu forte. Sa plaja de Murtas, connoschida puru commente plaja de Quirra e s’Acqua durci, est posta in su puntu in su cale su riu Quirra ch’essit a su mare, donande un’ammaju unicu a sa bista.

Po medas annos, custa plaja est bistada serrada casi de su tottu a su pubbricu, po sas istrintas ligadas a sa presentzia de su poligunu militare. Intames, dae su 2016, sa zura in sa cale si podet andare est bistada allargada in sos meses de s’istiu, dae lampadas a capidanni, permittinde gai a unu numeru pius mannu de bisitadores de godire de cust’incantu naturale. Mancari custu, una parte pitticca posta in su norti de sa plaja addurat riservada solu a su personale de sa base, ammantenninde unu pagu de arrecchettu e protessione po custa zura.

Sa disponibilidade de sa plaja de Murtas, est duncas un’opportunidade unica, po iscoperrere una de sas costeras pius bellas e ammaghiantes de sa Sardigna. Cun sas abbas limpias suas, sas dunas maestosas e sa rena dorada, custa plaja donat un’esperientzia chi non si podet ismentigare a tottu sos chi tenent sa fortuna de la bisitare, assumancu fintzas a sa fine de capidanni e duncas de sa classica istagione de su mare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22