Lunis 27 de maju, Elmas at accasazzare sa mustra “5Chentu bortas Chentu”, unu accadessimentu chi promittit de essere una emossionante e unica tzelebrassione de sa vida longa sarda. S’addobiu est in su Teatru Comunale Maria Carta, cumintzande dae sas 18.00. Inoche ant essere esponnidas 500 fotograffias, fruttu de su tribagliu de medas annos de su connoschidu “Fotograffu de sos chentenarzos”, Pierino Vargiu.

Pierino Vargiu, paris cun sa muzzere Angela Mereu, at dedicadu annos a viazzare po tottu s’isula, acciappande cun sa macchina fotograffica sua sas caras e sas istorias de sos pius betzos abitantes de sa Sardigna. Custas fotograffias, non solu documentant sa betzesa chi non si podet creere de sas personas, ma apparant puru un’intima mirada supra sa vida, sa cultura e sas traditziones chi annodittant custa regione.

Sa mustra at essere un’occasione po si affundare in custu ammaghiante biazzu visivu in su tempus, gratzias a sas figuras chi contant sa vida e sas esperientzias de pessonas chi sunt arrivadas e ant passadu su accabbu de sos chentu annos. S’accadessimentu no at essere solu una simple apparada fotograffica, ma puru un’occasione po iscurtare istorias e cosas curiosas derettu dae sos attores e dae sas pessonas chi ant tribagliadu accanta a issos.

S’addobiu de su 27 de maju, at essere medradu dae s’iscrittora Alessandra Sorcinelli, chi at a ghiare sos presentes in mesu a custa istravanada abbentura, contande sas esperientzias e sas porfias accomettadas dae Pierino Vargiu e Angela Mereu in sos biazzos insoro e de sas accorradas fotografficas. Sorcinelli cun sa sensibilidade e cumpetentzia sua, at ischire dare attera fundaria e cuntestu a sas figuras apparadas, arrendinde sa serana puru pius ammaghiante e de signifficu.

In pius, sa mustra “5chentu bortas Chentu” est unu donu non solu a sos suggettos retrattos, ma puru a s’iscansabbile tribagliu de Vargiu e Mereu, chi cun passione e dedissione ant datu unu contribbudu po preservare e balorizzare sa memoria istorica e culturale de sa Sardigna. Sas fotograffias esponnidas non sunt simple ritrattos, ma beros e proprios contos chi si bient e trasmittini emossiones sapiesa e bellesa de sa vida.

Custa apparada est duncas un’occasione chi non si podet perdere po chie cherzat connoschere pius dae accurzu s’ammaghiante fenomenu de sa bezzesa sarda, po mesu de sos oggios de chie at ischidu collire e eternare s’essentzia de custas istravanadas bidas chentenarzas. Non bos perdides s’occasione de partetzipare a custu abbenimentu unicu e de bos dassare incantare dae sas istorias e dae sas caras chi ant fattu s’istoria de sa Sardigna.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Ulassai si preparat a sa Biennale de arte de custos tempos.

Ulassai si preparat a accasazare un’edissione nova de sa Biennale de arte de custos tempos, un’addobiu culturale chi in sos urtimos annos est assuminde unu rolu semper prus importante in sa bista artistica de sa Sardigna. S’abbenimentu at a partire su 21 de martu, revertinde pro paritzos meses sa bidda ozzastrina in d’unu logu de addobiu pro artistas, istudiosos, appassionados e bisitadores chi arribant dae donzi parte de s’isula e non solu.

Mustras, istallatziones, addobios e mamentos de cunfrontu ant a animare sos logos de sa bidda, apparande a su pubbricu s’occasione de si accostare a s’arte de custos tempos e de iscoperrere limbazos creativos novos. Sa Biennale est dedicada a sa frigura de Maria Lai, una de sas prus importantes artistas italianas de su Noighentos e ligada in manera funguda a sa terra sua de issida. Ulassai est difattis sa bidda in sa cale s’artista est naschida e inube at dassadu unu signu forte meda pro mesu de paritzas operas chi negossiant cun sa bista e sa comunidade.

S’edissione de su 2026 de sa Biennale at a tennere comente tema sa lettura de un’opera de arte. S’intentu est cussu de cumbidare su pubbricu a abbaidare sas operas cun meda prus attentzione, chircande de cumprendere sos signifficos e sos nuntzos. Sa derettura artistica de s’abbenimentu est intregada a Gianni Murtas,
cun sos curadores istranzos Giannella Demuro, Ivo Serafino Fenu e Francesca  Sassu. Su tribagliu insoro at giuttu a sa creatzione de unu programma chi ponet impare artistas e operas capatzes de faeddare cun s’iscrocca, cun s’istoria de sa bidda e su pensamentu artisticu de Maria Lai.

A sa Biennale ant a partetzipare prus de vinti artistas chi arribant dae tottue, donzunu cun su propriu limbazu e sa propria chirca. Sas operas ant essere ispartas in paritzos logos de sa bidda, non solu in logos museales ma fintzas in atteros logos culturales e in carchi zura in fora.Custu at a permittere a sos bisitadores de iscoperrere Ulassai: sa Biennale est fintzas un’occasione importante po balorizzare s’iscrocca de s’Ozzastra e favoressere su turismu culturale.

Manifestassiones comente sa Biennale mustrant comente sas biddizolas potant divennere logos de interessu culturale mannu cando resessint a balorizzare s’identidade e su patrimoniu propriu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22