Sa laude po sa costa de Baunei, sonada torra pius forte in custas dies, gratzias a unu riconnoschimentu de grandesa dae su “The Worlds 50 Best Beaches”, unu porosu pianu chi donz’annu isseperat sas chimbanta plajas pius bellas de su mundu, faghinde partetzipare proffessioneris e espertos de custu campu.

Est cun braga chi Baunei biet duas de sas suas prendas de sa costa,brillare in custa classifica de grandesa de su mundu: Cala Mariolu, a su secundu postu, e Cala Goloritzè, chi est a su postu deghennoe. Unu risurtadu chi
non solu tzelebrat sa bellesa naturale de custos logos, ma puru s’impignu custante de sa comunidade de Baunei, po favoressere e preservare s’iscrocca sua.

Cun d’una noda de su Comune de Baunei, si legget:”Custu riconnoschimentu importante est de tottu sos baunesos chi ant su piaghere e s’onore de lu cundividere cun tottu sos medas visitadores de sa Costa nostra e de sos medas chi in Baunei, Santa Maria Navarrese e in tutta s’iscrocca nostra, godint de sos servitzios po su turismu:
pubbricos(Infopoint, retzida, assistentzia e miramentu) e privados.”

Custas paraulas evidentziant s’importantzia de s’assistentzia de sa comunidade locale e sos visitadores po preservare e balorizzare sos benes naturales e culturales de sa zura. Ma cun sa gioa e s’onore chi arribant dae custu riconnoschimentu de grandesa, bi est puru su dovere semper pius apprettosu de diffendere s’eco assentu chi deffinit custa istravanada, ma delicada, iscrocca.

Su Comune de Baunei reconnoschit custa responsabilidade, e s’impignat a garantire e mezzorare semper, sos servitzios chi dae annos benint apparados in sa Costa e in s’iscrocca a lacana. Custu incomiabile isfortzu, non solu assicurat un’esperientzia de turismu de calidade arta po sos bisitadores, ma contribbuidi puru a sa costoidura e sustenibilidade de unu patrimoniu naturale de valore mannu meda.

Po mesu de sa’attuamentu e s’azione fatta imparis, Baunei si cunfirmat non solu unu paradisu po sos oggios, ma puru unu esempiu de comente sa bellesa naturale, potat essere preservada e appretziada po sas ingendras de su tempus benidore.

S’Ozzastra, provintza a sa cale Baunei appartennet, si pesat cun braga commente ambasciadora de eccellentzia in su mundu. Custu riconnoschimentu, no solu tzelebrat sa bellesa de sas costas suas, ma puru sa dedissione e s’impignu de sas comunidades locales po faghere brillare custas duas prellas cuadas de sa Sardigna.

S’Ozzastra, cun sos tesoros naturales e culturales suos, sighit a brillare commnete un’istedda in su chelu turisticu de su mundu, imbidande biazadores dae onzi parte de su mundu a iscoperrere e s’indiosare de sa bellesa sua chentza tempus.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Sardigna de su rennu: unu tempus de autonomia e podere locale in s’ìsula medievale.

S’istòria medievale de sa Sardigna est sinzalada dae unu tempus ùnicu, cussu de sos zuigados, rennos autònomos chi ant caraterizadu s’ìsula intre s’XI e su XIV sèculos. Custos istados pitticcos, nàschidos a pustis de s’abbasciamentu de gadimentu de su podere bizantinu e de sas incurtziones àrabas, rapresentant unu capìtulu de fundamentu pro cumprèndere s’identidade istòrica e polìtica de sa Sardigna.

A pustis de sa fine de su poderiu bizantinu, s’ìsula s’est ispartida in rennos autònomos guvernados dae zùighes, friguras chi auniant funtziones polìticas, militares e zudiziàrias. Sos zudicados fiant ghìados dae famìllias nòbiles locales e si fundaiant subra unu assentu amministrativu e zurìdicu avanzadu pro cussu tempus. A su cumintzu si nche contaiant bator printzipales: su Zudicadu de Casteddu, su Zudicadu de Arbarèe, su Zudicadu de Torres (o Logudoro) e su Zudicadu de Gaddura.

Donzi zudicadu teniat capitale, esèrtzitu, leges suas e una istrutura amministrativa autònoma, chi permitiat de guvernare un’ iscrocca ispartida comente cussa sarda. Su podere de sos zùighes non fiat assoludu: s’azzudaiant cun unu cunsìziu de nòbiles e funtzionàrios locales chi los azuaiant a leare detzisiones.

Sa leze iscrita, connota comente Carta de Logu, mescamente in su Zudicadu de Arbarèe, regulaiat sa vida polìtica, econòmica e sotziale, istabilinde reglas tziviles e penales e amparande sos diritos de sos tzitadinos. Custu còdighe legale fiat un’istrumentu avanzadu pro cussu tempus e at influentzadu sa legisladura sarda in sos sèculos a pustis.

Sos zudicados, puru essende indipendentes, non ant bìvidu mai isulados: sas bèndidas issoro fiant ligadas a s’istrinta  a sas potèntzias de su Mediterràneu, comente Pisa, Gènova, Aragona e su Papadu. A mesu de alliantzas, cojas e gherras, ant chircadu de deffèndere s’autonomia insoro e de affortigare su podere locale.

Intre totus, su Zudicadu de Arbarèe s’est distìntu pro sa resistèntzia a sas dominatziones istranzas, in particulare in su mentres de sa luta contra de sos aragonesos in su  sèculu XIV.

S’abbasciamentu  lentu  de sos zudicados at cumintzadu cun s’abbattigu de fora e cun sas lutas intro de issos. A sa fine de su sèculu XIV, s’Aragona est resurtada a cunchistare sa parte pius manna de s’ìsula, annetende sos territòrios de sos zudicados e revertinde sa Sardigna in una regione suta su controllu aragonesu. Comente si siat, sa memòria de sos zudicados e de sas lezes insoro est abarrada biva in sa cultura e in s’istòria locale.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”