S’introdussione de sa proibissione de fumare a s’abbertu, cun d’una distanzia sigura dae s’attera zente, dezisu dae su Cunsizzu Comunale de Torino, po mesu de una delibbera chi at curreggidu su Regolamentu, est unu passu signifficativu po arribare a ambientes pius sanidosos e rispettosos de sas pessonas e de s’ambiente.

Custa detzisione, leada dae pagu, chi at aggiunghidu sa littera “v” a s’articulu numeru 7 de su Regolamentu de politzia urbana de Torino, istabilidi cun craresa chi fumare in presentzia de pitzinnos oppuru feminas raidas e in donzi logu a s’abbertu a pius pagu de chimbe metros dae attera zente, est proibbidu, si no si est alcansadu unu cunsensu claru.

Custa proibissione est po tottu sas formas de su fumu, cumprendinde sas sigarettas,zigarros,pipas, tabaccu iscardidu e donzi atteru prodottu e puru sas sigarettas elettronicas.

Sos motivos chi an ghiadu custa curretzione de su regolamentu sunt medas e fungudos. Po prima cosa, est netzessariu de diffendere sa salude de sas pessonas, poninde attentzione particulare a sos pizzinnos e a sas feminas raidas, chi tenent pius sensibilidade po sos dannos de su fumu chi arribat dae sos atteros. In pius, sa proibissione est fatta po agguantare ambientes pius sanidosos e minimare s’effettu malu de su fumu supra s’ambiente, cun s’atossigamentu de s’aera e sa frunnida de sas tzicas in terra.

Custa detzisione est posta in d’unu cuntestu pius mannu de atziones chi serbint po mezzorare sa calidade de sa vida e su sustentamentu de s’ambiente de sa tzittade de Torino. Mustrat puru s’impignu de sas autoridades locales po favoressere abesadas de vida pius sanas e responsabbiles, addia po bischidare sa zente supra de sas cunseguentzias
negativas de su fumu e favoressere trazos pius cabosos e rispettosos de su benessere de tottus.

Po mesu de custa curretzione de sa norma, su Cunsizzu Comunale de Torino si est postu in daenanti po tennere un’ambiente pius sanidosu e rispettosu,meledande sa voluntade de creare logos pubbricos inube tottu
cantos pottant godire de aera illimpiada e de un’isperientzia galaverosa, chentza tennere sos dannos de su fumu chi arribat dae sos atteros.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22