In Orroli si cuat una prenda de sa coghina chi unit cun sapientzia su connottu e s’annoamentu: Su Coccoi Pintau cun Sou. Custu pane, chi at binchidu sa medaglia de arghentu a sos campionados italianos de panitzada de su 2024, affigurada un’estremadia de sos mastros, fruttu de sa passione de Simona Prasciolu, una giovana panitzadora sarda.

Su segretu de custu pane ispantosu, est in sa cumposissione perfetta sua.

Fattu tottu cun simula de ranu tostu “Senatore Cappelli” biologicu, chi arrivat solu dae sa filera sarda, e cun matriche naturale e cussinnadu dae sa famiglia de Simona dae pius de tres seculos, Su Coccoi Pintau cun Sou
est su risurtadu de una produssione de mastros artigianos fatta cun cura e passione.

Sa partetzipatzione de Simona Prasciolu a sa bogada a campu de sa Federazione FIPGC, at mustradu unu momentu importante meda po sa panitzada sarda. In d’una cumpetissione allutta meda, Simona at brilladu in mesu de atteros 21 mastros de s’arte bianca chi sunt arrivados dae tottu s’Italia, mustrande, non solu sa calidade de su pane sou, ma puru s’abilidade sua in s’annoamentu e in sa cura de sos particulares.

Su chi rendet unicu su Coccoi Pintau cun Sou est s’impittu de su ranu antigu meda “Senatore Cappelli”, e de sa matriche, chi donat a su pane unu sabore e una fortesa chi non si podent cunfundere. Su seberu de usare solu sustantzias biologicas chi arrivant dae una filera sarda est unu elementu fundamentale in sa produssione de custu pane de eccessione.

Kentos si impegnat a mantennere regulas artas de calidade in tottu sa filera de su ranu tostu “Senatore Cappelli”, poninde a pare pius de 35 massajos, tottu sotzios de Coldiretti,in s’approvistamentu de sas sustantzias.

S’accadessidu de Simona Prasciolu e de su “Coccoi Pintau cun Sou” no est solu una binchida personale, ma puru unu riconnoschimentu de s’importantzia de sa filera de su ranu tostu de sa Sardigna a livellu natzionale. Po mesu de s’impignu e de s’abilidade sua,Simona at contribbuidu a promovera sa tradissione manna de sa panitzada isulana,
apparande in su mattessi tempus una foghe fundamentale po sos talentos zovanos de su logu.

Coldiretti Nugoro-Ozzastra, po mesu de sas paraulas de su Presidente Leonardo Salis e de su direttore Alessandro Serra, tzelebrant su sutzessu de Simona Prasciolu e de Kentos, commente unu motivu de arroddu po s’iscrocca de sa Sardigna. Custos risurtados sunt un’ispinta po sighire a imbestire in sas fileras locales,preservande in su mattessi tempus sas tradissione antigas e favorressende s’annoamentu.

Su “Coccoi Pintau cun Sou” est pius de unu simple pane: est unu simbulu de passione,tradissione e calidade, chi mustrat a su menzus s’estremadìa de sa panitzada sarda.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22