Su cumbinchimentu chi cando frearzu tenet unu die in pius, non nos teppimmos ispettare nudda de onu, l’aiana giai sos Romanos antigos, e bisu su chi est accadessinde in su mundu, carchi duda nos benit, e bois bi creeides?

“Annu bisestu, chi passet debresse”. “Annu bisestu chie pranghet e chie ticchirriat”. “Annu bisestu non si isposat e no si inferchid”, sunu solu carchi dicios populares ligados a su cumbinchimentu chi cando Frearzu tenet vintinoe dies non nos deppimmos ispettare nudda de onu. Custu lu pensaiana finzas sos Romanos. Po issos, frearzu fidi su mese de sos Feralia, sos ritos chi fini dedicados a sos mortos, duncas unu tempus dedicadu a sa amargura e a su coroju. Difattis in custu tempus si faghiat sa tzelebrazione de sas Terminalia, dedicadas a Termine, su Deus de sos limides, e sas Equirie, sas porfias de cursa cun sos caddos, cun sos carros de gherra in s’ara antiga de su Deus in su campu de Marte.

Sa porfia tzelebraiat s’accabu de unu tziclu cosmicu, affussiones, ambasduas ligadas a sa morte. Sos Romanos aiana postu in su calendariu insoro, una die in piusu onzi battoro annos, pustis de su vintibattoro de Frearzu po cumpensare sas ses oras chi adduraiana onzi annu dae sos trechentos sessantachimbe dies.

Su vintibattoro de Frearzu in limba ladina fidi su sestu die innantis de sas calendas Martias, e cussu die diventaidi su “bis sexsto die”, dae su cale est bessidu su nomene” bisestile”. Este custu sistema, chi pius a tardu est bistadu postu in su calendariu Giulianu, in su cale su mese de Frearzu, onzi battoro annos, giuchet vintinoe dies.

Est meda probabile chi su cunbinchimentu chi sos annos bisestos, giugherana isfortuna, arrivaiat èro itte si pensaiat chi esseret una abboja pagu fittiana e chi si podiat ispiegare in manera diffitzile, e commente tottu sos fenomenos divressos, beniat bivida cun diffidenzia.

Certu, cun cussu chi est accontessende in su mundu, in custas dies, tiada toccare de pensare chi sos Romanos, non teniana tortu meda, finzas si poi, abbaidande bene, non sunu medas sas cosas catastroficas oppuru cun zente morta chi sunu sutzessas in sos annos bisestos. E bois, itte nde pensades?

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22