Dae su 23 a su 26 santandria, Macumere at a acasagiare sa de bintuna editziones de sa Mustra regionale de su libru imprentadu in Sardigna, consolidende·si comente  su tzentru culturale de s’ìsula. Organizadu in collaboratzione intre s’amministratzione comunale de Macumere, s’Assòtziu editores sardos (AES), l’Atzentro servìtzios culturales e sa Biblioteca comunale, s’eventu s’at a acumprire in sos setores Tamuli e Filigosa de sas ex Casermas Mura, unende a pare editores, iscritores e amantiosos de libros.

Su tema ghia de ocannu est “Sardigna Ìsula a s’ispigru”, unu remonu a sa solidariedade, a sa dimensione sotziale e tzivile arraighinada in sos libros, sutaliniende s’importu de sa cultura e de sa literadura sarda. Sa presidenta AES, Simonetta Castia, evidèntziat sa netzessidade de amparare e animare s’editoria regionale sarda, chi rapresentat petzi s’1 pro chentu de sa produtzione natzionale.

Sa letura est cunsiderada unu trastu emblemàticu pro esplorare s’identidade culturale, geogràfica e antropològica istraordinària de s’ìsula. In su matessi tempus, si proponet comente unu limenàrgiu de rugrare pro adobiare s’àteru e fraigare unu mundu nou, inclusivou e creativu.

S’eventu bantat sa partetzipatzione de 34 editores bènnidos dae totu sa Sardigna, chi ant a espònnere sos catàlogos issoro in su Padiglione Tamuli. Su programa de sa mustra includet addòbios cun sos autores, leturas pùblicas, presentadas de òperas editoriales noas in italianu e sardu, laboratòrios pro sas iscolas e su cuntzertu “Il suono dei centenari” de su Trio Megalitico, cun sa partetzipatzione de su mastru de launeddas Luigi Lai.

Sa setzione “Tra isola e mondo” proponet 26 addòbios literàrios, cun tributos ispetziales a figuras comente cussa de Peppino Fiori, giornalista e senadore de sa Manca Indipendente, e Maria Pia Mossa, sa primu regista sarda. Ant a èssere  onorados Francesco Salis, fundadore de su Tzentru de cultura populare de Santu Lussùrgiu, e su poeta nugoresu Pasquale Dessanai.

Sa setzione dedicada a su patrimòniu de sa Sardigna, mutida “Sardegna per  immagini”, proponet sa presentada de volùmenes chi esplorant su patrimòniu archeològicu, istòricu e naturalìsticu de s’ìsula. Sos addòbios cun sos iscritores includent personalidades comente a Alberto Capitta, Nicolò Migheli, Eliano Cau, e medas àteros.

Sa Mustra dèdicat atentzione particulare a sos giòvanos a traessu su progetu “Adotta un libro sardo”, intregadu a sas iscolas primàrias e segundàrias. Prus de 1900 istudiantes ant a partetzipare a sas medas propostas, cun laboratòrios e addòbios, sustentados dae su Tzentru servìtzios culturales e de sa Biblioteca de Macumere. Unu momentu de aprofundimentu subra sas problemàticas de s’editoria est prevìdidu in su merie de domìniga su 26 santandria, abertu siat a sos prepostos a sos traballos siat a su pùblicu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Buscos Abertos 2026, battoro addobios po iscoperrere su Parcu de  Tepilora.

Sae de chimbe edissiones de “Buscos Abertos” est pronta a torrare a battire a su tzentru su patrimoniu culturale de su Parcu de Tepilora cun d’unu calendariu de battoro zoronadas ispartas in sos comunes de sa zura diffendida. Si partit sapadu 11 de aprile dae Lodè mentres sa die imbeniente s’initziativa at a passare in Bitzi. Su programma at a sighire su 19 in Torpè e at accabbare su 25 de aprile in Pasada.

Sa bogada a campu proponnet attividades pensadas pro unu pubbricu mannu cun attentzione particulare pro sas famiglias e appassionados de sa natura. Sas passizzadas ghiadas e sas attividades praticas ant a permittere de connoschere dae accanta logos e bistas apparande esperientzias derettas e chi appassionant. In su mentres de sas dies ant essere proponnidoss fintzas momentos dedicados a s’istoria, s’archeologia, su connottu locale e s’isport.

Non ant a mancare sos produttos de s’iscrocca e sos tribaglios de s’artesanadu imparis a momentos de disaogu e addobios musicales. Sos partetzipantes ant a podere rugare iscenarios meda divressos intre issos, dae sos buscos de s’arta Barbagia fintzas a sas zuras lentas de sa costa de sa Baronia sighinde su cursu de su riu Pasada. Sas bisitas si ant a podere faghere a pe, in bicicretta o a caddu oppuru in quad ma fintzas in kayak o cun d’unu trenu pitticcu, permittinde a tottus de seperare sa manera prus adatta pro bivere su Parcu.

S’initziativa est accottada dae sa Regione Sardigna e da sa Fundatzione de Sardigna e d’est ordiminzada dae sa cooperativa Istelai cun s’accottu de sos tzentros de educatzione ambientale de s’Agentzia Forestas, de sos assotzios locales e de sos operadores de s’iscrocca. Su presidente de su Parcu Martino Sanna evidentziat comente s’interventu est divennidu in sos annos un’addobiu importante meda, capatze de faghere accudire bisitadores e de favoressere una manera de bivere
s’iscrocca, prus attenta a sa natura, a sa cultura e sa cundivisione.

Buscos Abertos si cuffirmat duncas comente un’occasione pro connoschere dae accanta s’iscrocca, abbaccare sos ritimos e iscoperrere su balore de s’istare imparis in ambientes naturales de bellesa manna, balorizzande sos benes locales e su ligonzu intre comunidade e ambiente.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22