Dae su 2024, su rèditu de tzitadinàntzia in Germània at a crèschere finas a prus de 560 èuros, rapresentende una crèschida significativa respetu a sos 502 èuros atuales. Sa crèschida est de a su mancu 60 èuros a su mese pro sos benefitziàrios sìngulos, faghende lòmpere s’importu mensile a 562 èuros. Custa mòvida at otentu unu cunsensu mannu in su paisu, cun su guvernu chi reconnoschet sa netzessidade de sustentare sas persones prus bisongiosas, mescamente in unu perìodu de inflatzione e de crisi econòmica.

A su presente, in Germània, benefìtziant de su rèditu de tzitadinàntzia prus de chimbe milliones de persones, cun un’importu de 502 èuros pro sos mannos e  420 èuros pro sos giòvanos. Nointames, a cumentzare dae su 2024, custas tzifras ant a crèschere galu de prus de su 12%, comente  propostu dae sa SPD, sustentadu dae su ministru federale de sos afares sotziales Hubertus Heil.

Custa crèschida est istada acollida bene dae sa polìtica tedesca e dae organizatziones comente  s’Assòtziu sotziale tedescu (SoVD). Nointames, unas cantas organizatziones pensant chi sa crèschida non siat galu bastante pro garantire un’amparu adeguadu a sas persones prus bisongiosas.

In Itàlia, imbetzes, su rèditu de tzitadinàntzia introduidu in su 2019 non che at a èssere prus dae su 2024. A su postu suo, est prevìdidu un’assegnu de inclusione e unu suportu pro sa formatzione a su traballu. Custa detzisione nd’at pesadu unu dibatu mannu in Itàlia, cun opiniones divesas subre s’eficatzidade de su rèdditu pro su sustentu de sas persones in dificultade e pro s’impatu sua in s’ocupatzione.

Mentras in Germània s’est assistidu a una sèrie de aumentos de su rèditu de tzitadinàntzia pro afrontare s’inflatzione e sas dificultades econòmicas, s’Itàlia est chirchende un’acostamentu diferente pro frunire suportu a sos tzitadinos. Sa detzisione de abrogare su rèditu de tzitadinàntzia rifletet sa cumplessidade de sa chistione e sa netzessidade de adatare sas polìticas sotziales a sas cunditziones econòmicas e sotziales in evolutzione.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22