S’episòdiu de unu grupu de italianos chi si nch’est fuidu dae unu ristorante in Albania sena pagare su contu at atiradu s’atentzione de sa polìtica italiana. De s’intzidente nd’aiat allegadu pro primu su primu ministru albanesu Edi Rama, chi at contadu comente su propietàriu de su ristorante non diat àere dadu pesu a su chi est capitadu. Su fatu at lòmpidu sas origras de sa primu mnistra italiana Giorgia Meloni, chi no at isetadu meda a pigare providimentos. S’eventu est istadu fatu connòschere a su pùblicu cun  una comunicatzione ufitziale de s’ambasciada italiana de Tirana.

A su chi s’ischit su contu fiat de unos 80 èuros, chi currispondent a 8.451 lek. In sa nota ufitziale de s’ambasciada si leghet chi pro inditu  de su Presidente de su Cussìgiu, Giorgia Meloni, su contu est istadu pagadu. Ma però, chie at pagadu in manera efetiva sa chena? Sa dimanda est nàschida sende chi no est istadu ispetzificadu si s’ambasciada apat fatu su pagamentu impreende fundos destinados a sas ispesas diplomàticas o si sa presidente apat pagadu de persona s’importu.

S’ausèntzia de custa informatzione at generadu chistiones e ironias, mescamente dae banda de s’opositzione. S’est sutaliniadu chi s’atzione de Giorgia Meloni diat pòdere èssere interpretada comente  un’intzentivu pro àteros cumportamentos non curretos dae banda de sos italianos in s’èsteru, duncas est pretzisu chi Meloni intervèngiat personalmente pro pagare sas ispesas issoro. Unos cantos ant brulladu subra de sa possibilidade de lassare contos non pagados in giru e los fàghere posca a polìticos importantes.

Pro agabbare sas chistiones, s’ambasciada italiana at pretzisadu chi s’importu est istadu licuidadu cun fundos personales de sa presidente Meloni tràmite s’ambasciada matessi, chi at agidu comente  intermediàriu in su trasferimentu de su dinari. In sustàntzia su pagamentu est istadu fatu cun sos fundos de Palatzu Chigi, sa residèntzia ufitziale de su Presidente de su Cussìgiu. Nointames, abarrat sa duda si custa atzione potzat intzentivare una genia de “turismu malu-pagadore” dae banda de sos italianos in s’èsteru, isperende sa primu ministra intervèngiat pro pagare sos dèpidos issoro. In custu cuntestu, sa detzisione de Meloni paret siat istada motivada dae s’intentzione de preservare s’onore natzionale italianu, mancari pro mèdiu de s’interventu de s’ambasciada e de sos fundos istatales.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Su tempus benidore no est una cosa a tesu o astratta: in meda casos est giai incumintzadu e creschet cun sas ingendras noas. Sas tecnologias de su tempus benidore ant a èssere arminzos de fundamentu pro istudiare, tribagliare, nàrrere e tènnere cura de su pranetta. Lu cumprendere dae pitzinnos cheret nàrrere èssere prus ammaniados a accomettare sas proas de cras cun curiosidade e cun seru.

Una de sas tennologias prus importantes est s’intellighentzia artifitziale, giai presente in sos telèfoneddos, in sos giogos, in sos programas de istùdiu e inis retzes sotziales. In su tempus benidore at a èssere semper prus impittada pro azzuare sa zente a imparare menzus, a mezzorare sa meighina, a fàghere sas biddas prus balidas e a favoressere su tribagliu de s’òmine, chena remendare  sa creatividade e su pensamentu crìtigu.

Un’àteru logu chi creschet in presse est sa robotica. Sos robòts de su tempus benidore no ant a èssere solu màchinas de s’industria, ma ant a azzuare in sos ispidales, sas iscolas, sas domos e in incarrigos de azzudu. Ant a pòdere fàghere tribaglios faticosos o perigulosos, lassande a sa zente prus tempus pro sas cosas creativas e pro sas relatziones.

Ant a tènnere un’ ammentu mannu fintzas sas tecnologias pro s’ambiente. Sas fortzas annoabiles, comente su sole e su bentu, sas maneras pro minimare s’impestadura e sas materias chi durant ant a èssere importantes  pro diffendere su pranetta. Sos piseddos ant a tènnere unu rolu  crae in s’isviluppu de azzudos tecnològicos chi podent firmare su càmbiu de su tempus.

Su tempus benidore at a èssere semper prus digitale puru pro mèritu de sa realidade virtude e de sa realidade aumentada. Custas tennologias ant a permittere de istudiare s’istòria andande in sos logos antigos, de imparare is iscientzias cun sas friguras e de si allenare in logos seguros e pare-pare. Imparare at a divennere un’iscarmentu  prus apprettante e ispassiosu. No ant a mancare sas cosas noas in s’ispàtziu e in sa manera de nàrrere.

Sos Satellites, sas bìas in s’ispàtziu e is retzes noas de collegamentu ant a fàghere su mundu semper prus ligadu, donande noas possibilidades de ischire e de tribagliare imparis a sa zente de àteros paisos. Sas tecnologias de su tempus benidore no sunt solu istrumentos, ma sunt responsabbilidade. Si s’impittant bene cheret nàrrere respetare sos àteros, diffendere sos datos personales e faghere  seperos bonos.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”