Montpellier at a introduire su trasportu pùblicu a indonu At a èssere sa tzitade frantzesa prus manna a introduire custu sistema. Dae su 21 nadale 2023, sos residentes ant a pòdere impreare unu permissu gratùitu pro sos trasportos a traessu de sa rete de postale e tramvi de sa tzitade. Su sistema punnat a reduire sas emissiones, s’incuinamentu e megiorare s’atzessibilidade pro sos abitantes de sa tzitade.

«Introduende su trasportu lìberu, tenimus su coràgiu de pigare una medida de giustìtzia sotziale, de progressu, chi funtzionat pro sa transitzione ecològica». At naradu su sìndigu de Montpellier, Michaël Delafosse. Montpellier isperimentat giai su trasportu gratùitu ogna fine de chida dae su mese cabudanni 2020. In su 2021 fiat istadu estèndidu a sas dies feriales pro sos minores 18 e prus mannos 65. S’estensione de su progetu faghet parte s’ispesa de sa tzitade de 150 milliones de èuros in favore de sa mobilidade a zero emissiones, chi cumprendet fintzas investimentos in sas pistas tziclàbiles e sa creatzione de una zona a emissiones bassas.

Finas duos paisos europeos si distinghent pro custu sistema de trasportu de badas. Sa capitale èstone Tallinn at introduidu su trasportu pùblicu de badas in su 2013. In su 2020, Lussemburgu est devènnidu su primu paisu a su mundu a abolire sas tarifas in totu sos trasportos pùblicos.

S’Ispagna est isperimentende s’introdutzione de billetes ferruviàrios de badas pro sos biàgios a cùrtziu e mèdia distàntzia in s’àmbitu de unu programa chi at a durare finas a sa fine de s’annu. In custu modu si punnat a reduire s’impatu de sa crisi de su costu de sa vida, reduende in su matessi tempus sas emissiones de CO2. Sa Germània at introduidu unu provedimentu aguale intre làmpadas e austu de s’annu coladu, cun unu pass natzionale iscontadu pro sos trasportos pùblicos. At cunsentidu a sos biagiadores de gosare sena lìmites de sos servìtzios locales e regionales a 9 èuros a su mese ebbia.

In prus Frantza e Germània regalant custu istiu 60.000 billetes ferruviàrios de badas a sos giòvanos pro animare sos iscàmbios culturales. Prus de 50 tzitades europeas ant introduidu su trasportu pùblicu de badas, pro parare fronte a sos problemas de sos cambiamentoo climàticas e s’agualidade sotziale comente motivatziones printzipales.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sardigna, torrat sa limba bleu: in austu iscopertos 9 logos deinfetzione.

In d’unu mese 48 animales cundidos e 13 mortos. Addurant sutta de osservatzione puru sa Frebba de su Nilu e sa dermatite nodulare de sas baccas. Cun s’arrivu de sas temperaduras artas, in Sardigna torrat fintzas sa Limba bleu, sa maladia chi corpat sos gramuladores e chi in sos annos passados aiat postu in brinugu medas pesamentos de s’isula.

Secundu s’urtimu azzoronamentu sunt 9 sos logos de infetzione de Blue Tongue chi si sunt isviluppados in s’isula in su mese de austu, a sos
cales si azzunghent sos 15 de su mese de triulas, po una summa de 24 in s’istiu 2025. In austu, sos locos pius corpados sunt bistados Casteddu cun 2, su nugoresu cun d’unu e mescamente s’Ozzastra cun 6. In tottu sunt bistados cuntagiados 48 animales supra 2.084 presentes in sas zuras interessadas, cun 13 animales mortso po su virus.

Sa diffusione in Sardigna est mescamente de su tipu 8, giai connoschidu in sos annos passados, ma nde sunt bistados agattados fintzas de su 3 e 4, cunfirmande sa variedade de su virus chi est circulande in s’iscrocca. Sa Blue Tongue no est unu perigulu po s’omine, ma podet corpare in manera grae berbeghese, crapas e baccas, faghinde dannos meda a livellu accolomicu e de produssione. Sa trasmissione arrivat cun sa puntura de arrabbios pitticcos, sos culicoides, chi agattant in sas dies cardas e umidas sas cunditziones ideales po si ammanniare.

In pius de sa Limba bleu,sos controllos in Sardigna si sunt faghinde puru po atteras maladias virales: Sa Frebba de su Nilu Occidentale e sa dermatite nodulare de sas baccas. Sas autoridades invitant sos pesadores e sos chi tribagliant in cussu campu de bistare attentos, rispettare sa biosicuresa e azzuare sos veterinarios po sinzalare donzi casu suspettu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22