Su Macomer Calcio, assòtziu isportivu, istòricu de sa tzitadina de su Màrghine, est acanta de tzelebrare su  tzentenàriu suo cun unu progetu artìsticu de grandu importu. At a èssere cuncordadu unu murale de 80 metros cun sos colores sìmbulu siat de s’iscuadra siat de sa comunidade matessi. Custa òpera, destinada a devènnere un’icona de s’istòria e de s’identidade locale, s’insertat in su cuntestu de su Fèstival de sa Resilièntzia, chi at detzìdidu de si dedicare totu a sa cummemoratzione de sos 100 annos de custu assòtziu isportivu istraordinàriu.

Sa realizatzione de su murale at a èssere un’ocasione partetzipativa pro totu sos tzitadinos de Macumere. Dae su 19 a su 30 de trìulas, Valentina Vinci at a ghiare unu interventu abertu a chie cheret contribuire a s’òpera e a sas tzelebratziones. Custa initziativa inclusiva at a dare s’oportunidade a persones de cada edade de lassare su sinnu pròpiu in custu progetu de arte colletiva.

Posca, dae su 22 a su 31 de trìulas, ant a intervènnere duas artistas de fama internazionale: Mafalda Goncalves de su Portugallu e Agus Rucula de s’Argentina. Cun s’impreu de fotografias e anèddotos, sas duas artistas ant a dare vida a su contu dèchidu e ammajadore de un’istòria grogo-ruja chi durat oramai dae  unu sèculu. Custa narratzione artìstica at a permìtere a sos tzitadinos de torrare a bìvere momentos indimenticàbiles e iscobèrrere pessonàgios memoràbiles acapiados a s’ASD Macuer Calcio.

Sas tzelebratziones pro su tzentenàriu de s’iscuadra prevident una sèrie de initziativas ispetziales chi ant a interessare totu sa comunidade, comente sa realizatzione de unu libru chi at a collire totu s’istòria de s’iscuadra, unu torneu de giòvanos talentos, un’annullamantu filatèlicu dedicadu a s’eventu e una festa chi at a interessare totu sa bidda. In prus, s’ant a organizare loterias e regortas de fundos pro s’achistu de unu postalinu.

S’atentzione pro sas tzelebratziones de sos 100 annos de s’ASD Macomer  e sas manifestatziones in programa pro cabudanni promitent de èssere eventos memoràbiles. Custu tzentenàriu est unu momentu de grandu importu pro sa comunidade, ca testimòniat su ligàmine forte e durajolu intre s’iscuadra de fùbbalu e sos tzitadinos de Macumere, unu ligàmine chi at rugradu su tempus, superende disafios e cambiamentos.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Carbònia, su Museo de su Carbone: unu viazu in sos tempos de sa memòria de su Sulcis de sas minas.

In su corizone de Carbònia, a intro de sa ‘idditzola de de Serbariu, b’at a dies de oe unu de sos museos pius de importu de sa Sardigna. Est su Museo de su Carbone, chi est dedicadu a s’istoria de sas minas. Est unu logu chi nos contat non solu s’istoria de cussu logu, ma fintzas sa vida de òmines e fèminas chi po annos e annos ant triballiadu in cussas minas.

Serbariu, inube si triballiaiat dae su 1937 a su 1964, fuit comente una funtana de abba semper bundante, inube sa zente si nche catzaiat su sìdiu de su tribàlliu. Est cussu su logu chi at batidu dinare meda a sa zona, ma puru energia manna a totu s’Itàlia. Su carbone de cussas minas, infatis, daiat tribàlliu a sas fàbricas, a sas tzentrales e a sas ferrovias, diveninde motore de modernizatzione industriale de totu sa natzione nostra.

Addaghi ant serradu sas minas, cussos logos pariat chi nos nche los depimus ismentigare, ca pariat chi non b’aperat abbarradu pius nudda. Invetze, b’ant fatu unu prozetu de recùperu e de valorizatzione manna, dande vida noa a totu cussos logos, chi sunt divènnidos unu museo chi, ancora a dies de oe, betat a pare sa memòria istòrica, sa didatica e sa capatzidade de divulgatzione.

Po chie andat a bìere custu museo, b’at paritzos zassos de visitare. B’est sa lampisteria, chi est su logu inube b’at una mostra chi est aberta totu s’annu e chi nos contat s’istòria de su carbone, de sa mina e de sos caragolos suos,ma puru de sa ‘idda de Carbònia, nàschida in su 1938 po retzire sas famìlias de sos triballiantes. Incue b’at unu muntone de làmpanas antigas chi si impreaiant in sas minas, ma b’at fintzas trastes e documentos, filmigheddos de sos tempos de tando fatos a sos triballiantes e puru intervistas fatas addaghi sa mina fuit zai serrada.

B’at puru fotografias meda de una bellesa rara. In custos caragolos e percolos chi nos permitint de atraessare sa mina, si podent bìere totu sos logos chi cada die sos minadores pupulaiant addaghi andaiant a triballiare. In sa sala Argani bi sunt poi totu sas màchinas chi permitiant su tribàlliu a tempos de tando.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22