Inauguradu in Tortolì s’oratòriu diotzesanu mou “Amorosp Laetitia”: un’ispàtziu polifuntzionale destinadu a devènnere unu puntu de riferimentu pro sa comunidade locale. Sa tzerimònia de abertura s’est acumprida in su merie de mèrcuris 19 e at bidu sa partetzipatzione de su pìscamu de Nùgoro e Ogiastra, Antonello Mura, e de s’assessore regionale Aldo Salaris. S’istrutura, realizada gràtzias a unu finantziamentu de unu millione e 350.000 èuros donados dae sa regione e 350.000 èuros postos dae sa Cùria, s’agatat a presu de sa sede de sa Caritas diotzesana Ogiastra.

S’oratòriu nou s’insertat in su cuntestu de su tzentru interparrochiale e oferit maicantos servìtzios e fainas pro totu sos tzitadinos. A s’esternu, sunt presentes tres campos polivalentes pro praticare isport comente su padel, su calceto, su basket e sa pallavolo, cunsentende gasi a sos apassionados de mantènnere un’istile de vida ativu e sanu. A s’internu de s’istrutura printzipale, b’at una palestra ispatziosa e moderna, frunida de totu sas atretzaduras netzessàrias pro s’allenamentu.

Ma sas oportunidades ofertas dae s’oratòriu non si lìmitant a su campu isportivu: sunt disponìbiles fintzas diversas salas atretzadas pro laboratòrios creativos, letziones de mùsica, addòbios e àteras fainas culturales e formativas. S’obietivu est su de promòvere s’isvilupu integrale de sas persones, in manera indipendente dae s’edade, oferende oportunidade pro crèschere, imparare e sotzializare.

Sa tzerimònia de inauguratzione at bidu sa partetzipatzione de medas famìlias de sa comunidade, nointames su calore, testimoniende su cuntentu e s’interessu pro custa istrutura noa. Su pìscamu Missennore Antonello Mura at sutaliniadu s’importu de s’oratòriu comente  tzentru de formatzione e incroimentu sotziale, ponende in evidèntzia s’impinnu de sa Crèsia in sa promòtzione de s’edicatzione e su benèssere de sas persones.

Fintzas sas autoridades presentes ant espressadu s’apretzamentu issoro pro custa istrutura donada a sa tzitadinàntzia tortoliesa. S’assessore Aldo Salaris at sutaliniadu su balore formativu de s’oratòriu e su contributu suo pro su megioru de sa calidade de sa vida de sos giòvanos e de sas famìlias.

Su vitze sìndigu Luigi Cardia at sutaliniadu s’unitzidade de custa istrutura, chi rapresentat un’oportunidade ùnica pro sas generatziones noas. At cumbidadu sos giòvanos a isfrutare totu sas possibilidades ofertas dae s’oratòriu, ca sa generatzione sua no at tentu sa matessi fortuna.

In concrusione, s’inauguratzione de s’oratòriu diotzesanu “Amorosa Laetitia” rapresentat unu passu significativu pro sa comunidade de Tortolì. Un’istrutura moderna e polivalente chi si proponet de èssere unu logu de addòbiu, crèschida personale e istentu pro totu sas edades. Cun sos campos isportivos suos, sas àulas pro sos laboratòrios creativos e sas salas pro sas fainas culturales, custu oratòriu promitet de devènnere unu tzentru vitale pro sa vida sotziale e culturale de sa tzitade.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22