Su Treninu Birde, unu de sos sìmbulos de su territòriu sardu e un’atratzione turìstica sua, at inauguradu s’istajone turìstica  cun un’incumentzu malu. Sa partèntzia inaugurale s’est acumprida eris dae s’Istatzione de Arbatassa cara a sa de Lanusè in ocasione de sa Sagra de sa Cariasa, ma a dolu mannu su biàgiu est istadu una delusione a betu. In intro de su trenu si sunt contadas prus pagu de deghe persones , unu nùmeru in manera bàsciu meda, cunsiderende s’importu e sa peculiaridade de su treninu pro su territòriu.

Sa partetzipatzione iscassa diat pòdere èssere atribuida a sa mancada promotzione de s’eventu e a s’abertura de sas aparauladuras petzi una pariga de dies a in antis de su cumintzu de s’istajone. Custu  preavisu piticu diat pòdere àere impedidu a medas visitadores potentziales de organizare su biàgiu issoro in antìtzipu e de partetzipare a s’abertura de s’istajone turìstica de su Treninu Birde.

Nointames custu cumintzu deludente, su servìtziu de su Treninu Birde diat dèvere sighire cun duas cursas  cada chida, programadas pro sa chenàbura e su sàbadu, cun destinatzione s’istatzione de Lanusè. Mancari, a oe, lunis, non sunt galu disponìbiles possibilidades de prenotatzione, lassende medas interessados dudosos subra sas datas e s’atzessibilidade de su servìtziu.

Est importante bìdere chi su percursu de su Treninu Birde at subidu una reduida significativa in su cursu de sos annos. Finas a su 2014, su trenu moviat dae Arbatassa e crompiat Mandas, faghende una trata de 159 km. Nointames, posca su percursu s’est reduidu in manera progressiva, iscostiende s’arribu in antis a Sàdili, posca a Gàiru e in fines a Lanusè, cun petzi 34 km de trata. Custu cambiamentu rapresentat un’evolutzione negativa pro su territòriu, chi pèrdet una de sas atratziones turìsticas suas prus caraterìsticas e peculiares. Sa reduida de su percursu lìmitat s’esperièntzia de sos visitadores e diat pòdere influire subra sa popularidade cumplessiva de su Treninu Birde comente a atratzione turìstica.

Nointames sas dificultades initziales e sos disafios atuales, s’isperat chi su Treninu potzat resèssere a  torrare a èssere un’importante puntu de riferimentu pro su turismu locale. Est fundamentale chi bèngiant adotados provedimentos eficatzes pro promòvere su servìtziu e rèndere prus atzessìbiles sas aparauladuras, in modu de favorire s’interessu e sa partetzipatzione de sos visitadores. Su Treninu tenet unu potentziale mannu pro ofèrrere un’esperièntzia ùnica a sos turistas, ammustrendelis  sas bellesas naturales e istòricas de su territòriu sardu, e diat èssere una làstima manna a pèrdere custa risursa pretziosa pro su turismu locale.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Gramsci e Lussu: duos sardos mannos chi ant sinzadu s’istoria de s’Italia.

Sa Sardigna at dadu sa vida a duas de sas figuras pius influentes de su Noighentos italianu: Antoni Gramsci e Emilio Lussu. Divressos po temperamentu, ma postos impare dae s’impignu tzivile, dae sa passione po sa zustissia sotziale e dae una annaghidura funguda cun sas raighinas isulanas proprias, Gramsci e Lussu ant sinzadu s’istoria politica e culturale de s’Italia, dassande un’eredidade chi est biva e presente puru a dies de oe. Naschidu in Ales in su 1891, Antoni Gramsci est bistadu unu de sos pius mannos istudiosos de su seculu XX.

Fundadore de su Partidu Comunista de Italia in su 1921 e autore de sos tzelebres Cuadernos dae sa Presone, Gramsci at isfroscadu unu pensamentu politicu cumplicadu e originale, tzentradu supra s’idea de dominassione culturale e s’importantzia de s’educatzione de sas massas. Sas ideas suas, trempidas in parte in su mentres de sa presonia longa sutta de su Fascismu, ant influentzadu in manera funguda, non solu sa politica italiana, ma fintzas su pensamentu ratzionale, sotziologicu e formativu a livellu internatzionale.

Mancari attesu dae sa Sardigna po una parte manna de sa vida sua, Gramsci at semper tentu unu ligonzu forte cun sa terra sua.A pagos annos de distantzia, in su 1890, naschiat in Armungia Emilio Lussu, figura de signifficu de s’antifascismu e de su repubblicanesimu italianu. Graduadu in leze e uffitziale in sa prima gherra mondiale, Lussu aiat contadu s’esperientzia de su fronte in su liberu “Un anno sull’altipiano”, memorias de sa gherra.

Fundadore de su Partidu Sardu de Atzione e pustis esponnente importante de su movimentu antifascista “Giustizia e Libertà”, Lussu fit bistadu obbrigadu a su disterru in su mentres chi bi fit Mussolini. Pustis de sa rutta de su fascismu, aiat partetzipadu a torrare a fraigare demograticamente s’Italia. Sa bista sua politica teniat unu sensu fungudu de zustissia sotziale. Gramsci e Lussu, mancari arribberant dae esperientzias divressas ant ambos dadu unu contribbudu a fraigare un’Italia pius cabosa, critiga e democratiga.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22