S’artista at bisitadu in segretu su repartu de Oncoematologia pediàtrica de Casteddu. S’est istentada pro prus de un’ora cun sos piciocheddos malàidos. Su gestu est lòmpidu a pustis de sa rechesta de una mama tràmite Radio Sintony e Radiolina.

No intervistas ebbia, autoscatos e vìdeos cun sos sighidores suos chi l’ant abetada finas dae sas 6 de  mangianeddu suta de sos istùdios de sas ràdios casteddajas. Laura Pausini, chi sàbadu  su 29 de Abrile fiat invitada presentare s’ùrtimu sìngulu cosa sua a Radio Sintony e a Radiolina, in ocasione de sos trinta annos de carriera, at fatu bìdere  torra cantu est mannu su coro suo e s’istima chi tenet pro sos àteros, mescamente pro sos chi no istant bene.

At rispòndidu a s’apellu chi pro mesu de sa ràdiu l’at fatu Stefania Lai, mama de  Mattia e voluntària de s’Asgop, s’assòtziu de sos babbos de malàidos oncoematologos. Stafania est una sighidora manna de Laura Pausini e pròpiu pro custu motivu l’at pedidu de fàghere una bisita ispetziale a s’ispidale Microciteèmicu de Casteddu, acanta est ricoveradu Mattia e medas àteros piciocheddos cun problemas de salude graes.

Sa Pausini at rispòndidu in deretura e cun brègiu a sa recherta de sa mama e a pustis de s’intervista cun Fede e Debby, sena fàghere publitzidade e propaganda meda, totu a iscusi, est andada a agatare sos pipios malàidos. Calicunu l’at bida e a pustis de l’àere reconnota non creiat a sos ogros suos. S’est istentada in su Microcitèmicu pro prus de un’ora, alleghende cun sos pipios, cun sos babbos, cun sos mèigos e sa capu-sala Cinzia Zedda. At fatu colare una die diversa a sos pitzocheddos ricoverados, a sas mamas, a sos babbos issoro e a totu su personale de s’ispidale, chi ogna die, cun impinnu mannu, curant sos patzientes ricoverados.

S’artista emiliana duncas at fatu una bella sorpresa a sos pipios e sos pitzocos de su Microcitèmicu de Casteddu.

Sa bìsita est istada organizada dae s’Asgop, s’assòtziu chi riunit sos babbos de pipios e pitzocos malàidos de patologias oncològicas.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22