Est mortu Maurizio Costanzo. Su giornalista, presentatore televisivu autore, iscenegiadore e meda àteru nos at lassadu a 84 annos. Est bènnidu a mancare chenàbura in Roma, a pustis de una chida chi fiat  ricòveradu pro un’interventu. Sa càmera mortuària at a èssere ammaniada sàbadu dae sas 10.30 a sas 18 in Campidògliu . Imbetzes, sos interros ant a èssere fatos lunis 27 de freàrgiu a ora de sas 15 de merie.

Maurizio Costanzo fiat connotu mescamente pro s’ispetàculu chi aiat su nòmene suo etotu, su Maurizio Costanzo show, chi cun sas 4.480 puntadas est andadu a in antis pro 41 annos, marchende pro semper s’istòria de sa televisione italiana. L’aiant serradu in su 2009, ma aiat torradu a cumentzare in su 2015.

Est famadu fintzas pro sa publitzidade  fata pro sa Dino Erre Collofit, sa camisa cun so mustatzos e peri pro s’ischieramentu suo contra sa màfia a costadu de Giovanni Falcone, cosa chi li fiat costadu un’atentadu cun una bomba chi però pro bona fortuna sua  non l’aiat fatu dannu pro ite sa die aiat impreadu un’àtera màchina.

At a èssere ammentadu peri pro su tesseramentu suo in sa PS, cun sa  tèssera nùmeru 1819 de sa P2, cosa chi l’aiat causadu calicunu problema. Calicunu annu a pustis, cummentende custu fatu aiat naradu de àere fatu una tontesa manna.

Est istadu giornalista, ma fintzas autore radiofònicu, televisivu, de cantzones famadas, una pro totus cussa iscrita pro Mina, Se telefonando.

Maurizio Costanzo fiat acapiadu meda a sa Sardigna.  In su 1976 s’esòrdiu cun su primu talk  suo“Bontà loro” fiat istadu sighidu dae àteros programmas fatos pro s’emitente regionale Videolina gràtzias a s’amighèntzia sua cun s’imprendidore Nicola Grauso. Ogna domìniga calada a Casteddu pro registrare s’ispetàculu. A Is Molas, at fatu sa primu vacàntzia cun sa mugere Maria De Filippi. Cando allegaiat de unu sutzessore suo naraiat chi unu chi podiat èssere cunsideradu erederi suo fiat Giovanni Floris, su giornalista de La 7.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Continuidade de s’iscrocca, billettos a pagu preziu fintzas po sos familiares de sos chi bistant in Sardigna.

Si podent comporare da oe sos billettos in continuidade de s’iscrocca riservados a sos familiares de sos chi bistant in Sardigna. Sa novidade est po su sistema de pesos de servitziu pubbricu chi regulat sos collegamentos aereos da e pro s’isula e accreschit su numeru de pessonas chi podent godire de sos pretzios aggevolados.

Sos billettos si podent comporare po sos bolos dae su 29 de martu, die in sa cale at a bintrare in fortilesa su sitema novu de sa continuidade de s’iscrocca. Cun custu seperu sa Sardigna reconnoschet su dirittu de biazzare a pretziu bassu, non solu a chie bistat in s’isula, ma puru a chie, mancari bivat in d’unu atteru logu, tenet unu ligonzu istrintu cun chie bistat in Sardigna.

S’assessora regionale a sas Carraduras Barbara Manca at nadu chi si trattat de unu passu in daenantis importante meda pro itte affortigat su cuntzettu de continuidade de s’iscrocca e tenet contu de su balore de sas famiglias in d’una iscrocca de isula comente sa Sardigna. Su risurtadu est fruttu de su tribagliu leadu a daenantis dae sa Regione Autonoma de sa Sardigna impare cun su Ministeru de sas Infrastrutturas e de sas Carraduras e sa Cummissione Europea, rispettande sas regulas europeas po sos collegamentos garantidos dae s’Istadu.

Ant a podere godire de sos pretzios aggiudados, cun d’unu accreschimentu minimu in cunfrontu a cussos istabilidos po sos chi bistant inoghe, ma cun d’unu pretziu massimu giai istabilidu, sos parentes fintzas a su terzu gradu. At a serbire a fizzos, babbos e mamas, frades e sorres, giagios e nepodes,tios e atteros nepodes. S’azzudu balet fintzas po maridos e muzzeres e po sos fizzos de sos famigliares chi tenent dirittu a s’iscontu.

Sa misura punnat a alcansare chie at dassadu sa Sardigna po motivos de tribagliu o de istudiu ma sighit a mantennere unu ligonzu forte cun s’isula, gai comente sas famiglias chi bivent partidas intre regiones divressas. S’intentu est de faghere divennere prus simple e prus pagu caru su viazu po chie depet torrare a domo pro motivos famigliares.

Sa cabuda de sos billettos a pretziu bassu affortigat duncas su dirittu a si podere movere in d’una regione chi po sa posissione geografica sua depet faghere sos contos cun collegamentos prus cumplicados e caros in cunfrontu a atteras zuras de s’Italia, azzuande non solu sos chi b’istant ma fintzas sas famiglias insoro.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22