Torrat a Gàiru, a pustis de duos annos de firmu pro more de sa pesta de su Covid 19, una de sos apuntamentos prus importantes de su carrasegare ogiastrinu, Su Marti Perra Gairesu.

Sa manifestatzione de ocannu est su resurtadu de sa collaboratzione intre S’amministratzione comunale e sos assòtzios de bidda, comente  sa Pro Loco, sa Sotziedade Isportiva Gairesa, Grupu Folk Sant’Elena Imperatrice e Gairo Vecchio ne Cuore, sena contare s’agiudu mannu de sos tzitadinos de Gàiru.

Sa festa est aprontada dae s’Assòtziu Culturale “Su Maimulu”. A sa manifestatzione de ocannu, a banda sas màscheras de carronovale de Gàiru, ant a partetzipare  deghe  grupos de carotes dae totu sa Sardigna, chi ant a isfilare fatu fatu de sos caminos de sa bidda de su Pardu. Pro s’ocasione ant a abèrrere magasinos e paradas, acanta sos bisitadores ant a pòdere tastare sos produtos donados dae sos tzitadinos de sa bidda. Comente traditzione in sas ventanas e in sos balandrados at a èssere picada sa cosa de papare chi sas màscheras ant a dèpere boddire pro dda pònnere in su  carru “Santu Nanì”.

S’isfilada at a cumentzare a ora de sas  15.30. Comente presentadora ocannu est istada seberada  sa giornalista de Sky Valentina Caruso, chi paris cun sos de sa pro loco at a contare e ispiegare sas traditziones de su carrasegare gairesu. Pro chie cheret papare e tastare sos produtos tìpicos de de bidda, a ora de chena ant a abèrrere sas paradas de sos “Amici de Su Maimulu”, e cuddas de sas Levas ’83 e ’93.

A s’agabbu de s’isfilada b’ant a èssere ballos sardos in pratza acumpangiados dae Simone Sirigu a s’organitu  e launeddas e dae  sa boghe de Federica Lecca.

Su su Maimulu gairesu, duncas, torrat a si cunfirmare unu de sos apuntamentos prus importantes de su carnevale ogiastrinu, una manifestatzione importante pro sighire a mantènnere sas traditziones e pro promòvere e fàghere connòschere su territòriu.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Appostamentu mortale in Orane:operaju de 38 annos mortu sutta de domo, s‘iscruccullat po su motivu.

Un’appostamentu in su coro de sa notte ad abbolottadu erisero sa comunidade de Orane, in su Nugoresu. Tonino Pireddu, operaju de 38 annos, est bistadu mortu a corpos de arma in su mentres chi fuit torrande in domo sua in su Cursu Italia. Unu crimene fattu a s’iscuru, daenantis a domo sua, chi faghet torrare a pigare sa tesone in sa bidda e abberit dimandas chi sunt tottu de accrarare.

Secundu sas primas ideas, s’omine, chi tribagliaiat po una ditta de s’arga, fuit appena torradu a domo, imparis a sa cumpanza sua. Pustis de aere frimmadu sa macchina, si diat essere frimmadu carchi mamentu intro de sa macchina mattessi po leare carchi cosa. Est bistadu in cussu mamentu chi calicunu, approfittande de s’iscuru e cun meda probabbilidade cuadu accanta a sa domo, at isparadu unu o pius corpos, bocchindelu.

Un’assione lestra e istudiada bene. Su killer, o sos killers, si sunt fuidos a sa lestra, faghinde perdere sas andalas insoro. Po su momentu non bi sunt testimonzos de s’appostamentu e niunu paret chi eppat bidu movimentos suspettos. Sos aberguadores sunt faghinde controllos in tottu su logu po chircare si bi sunt friguras de sa videosorvegliantzia o elementos chi potant serbire po cumprendere comente siant andadas sas cosas.

Sa cramida est bistada fatta appena si sunt intesos sos isparos. Sunt arribados sos carabbineris de sa cumpanzia de Nugoro e sos de su 118, chi ant tentadu in donzi manera de sarbare s’omine, ma po issu no bi est bistadu nudda de itte faghere: cando sunt arrivados fuit giai mortu. Sa nova si est isparta a sa lestra in Orane, dassande tottus isporos e incredulos. Pireddu fuit connoschidu meda comente tribagliadore e faghiat una vida allogada. Sa morte rebbesta sua a corpidu meda sos de famiglia, amigos e tzittadinos, chi como isettant rispostas.

Sa muda est ancora prus inchiettante po una cosa accadessida duos meses faghet. In su mese de Nadale, difattis, s’operaju aiat giai tentu un’atteru attentadu: li aiant brusiadu sa macchina. Un’attu chi oe tenet unu signifficu divressu meda. Sos aberguadores sunt controllande si bi siat unu collegamentu derettu intre cussu fattu e su mortoriu de eris notte. Fintzas a custu mamentu non si podet escluidire nudda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22