Su regista e autore televisivu Pietro Mereu pro sa primu bia at cuncordadu una trasmissione in limba sarda totu dedicada a sa coghina isulana. A pustis de su bellu traballu fatu  cun sa sèrie dedicada de sa coghina traditzionale, a tìtulu “Culurgiones Mon amour”, in custa sèrie noa su regista ogiastrinu at detzisu de cuncordare unu programma de 12 puntadas, 15 minutos ognuna, in limba sarda. Pro fàghere custa trasmissione at bisitadu sa Barbàbia, su Sarcidanu e sa Gaddura, a sa chirca de coghineris famados e capassos chi galu coghinant impreende sas retzetas de s’antigòriu. Sa sua est istada fintzas una chirca de produtores locale e de produtos genuinos e autènticos.

De custa manera  Mereu est andadu a Ulìana, pro addobiadu su coghineri Cenceddu Palimodde e sa mugere Tonina Biscu, posca, in Sarcidanu, at addobiadu  sa coghinera Annalisa Atzeni, e in  Gaddura a sa fundadora de sa coghina de “le MatriarcheE, Maria Antonietta Mazzone.

«In custa purrata istòrica chi semus bivende, de apratamentu culturale e non solu, pro cumprèndere chie semus e dae ue benimus, fintzas sas retzetas sunt de importu. Cando mi dimandant pro ite  sos sardos bivent meda, deo rispondo chi unu de sos segretos est sa cosa chi papant,  chi  in medas casos non sunt cambiadas durante sos sèculos», at naradu Pietro Mereu, chi at fintzas su chi at imbentadu su Longevity fest, est a nàrrere su Fèstival de sa longevidade”.

Sos documentàrios de Pietro Mereu, classe 1972,  in custos annos ant otentu una resèssida manna. Bastat a pensare a su documentàriu “Il clan dei Ricciai” , chi allegat de sos picadores de eritzos de mare, opuru “Il Club dei centenari”, docufilm dedicadu a sos tzentenàrios de s’Ogliastra, e “I managers di Dio”, acata sa règula benedetina benit aplicada a sos mètodos modernos de gestione aziendale.

Su programma Retzetas Antigas est prodùidu dae Terra de Punt e dirìgidu dae Fabio Ortu e Andrea Marras, sa produtzione esecutiva est de  Mereu etotu e de Maria Grazia Dessolis.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22