Tzina e Istados Unidos sunt gherrende a chie arribat prima pro s’introdutzione de s’intelligèntzia artifitziale subra de is motores de chirca.

Pechinu diat pòdere acudire prima de  Washington pro s’introdutzione de unu programma de abbistesa artifitziale sìmile a ChatGpt subra de su motore de chirca Baidu, una casta de Google tzinesu.

S’essida diat dèpere èssere in martzu. Una befa pro is americanos, sende chi  de su programma americanu si nde faeddat dae meda tempus.

Comente iscriet sa testada Bloomberg, Baidu diat àere ispatzadu milliardos de dòllaros in sa chirca subra s’intelligèntzia artifitziale. Su sistema suo, mutidu Èrnias, diat èssere unu modellu de aprendimentu automàticu isperimentadu dae medas annos e at a èssere sa base de custu sistema.

Pro su chi pertocat ChatGpt, si tratat de unu trastu de intelligèntzia artifitziale de OpenAI, chi at abbivadu su mundu de Internet a cumentzare dae s’essida pùblica sua acontèssida in s’agabbu de onniasantu e diat àere ammuntonadu prus de unu millione de impitadores in pagas dies.

Comente si podet immaginare non sunt mancadas is discussiones subra su  ruolu de s’intelligèntzia artifitziale in is iscolas, in is ufìtzios e in sa vida de ogna die.

Custa innovatzione est importante meda, sende chi Microsoft, de seguru non s’ùrtimu arribadu, est investende milliardos meda in custu programma.

Google etotu diat èssere creende unu rivale de ChatGpt chi si mutit Sparrow e chi diat pòdere èssere presentadu giai custu beranu chi benit.

ChatGpt est iscasiddende interessu in totu su mundu, cun impitadores chi sunt cumpartzende is ischermadas de cunversatzione de sa prataforma.

Amus a bìdere comente  at a andare a finire custu disafiu tecnològicu istadunidensu-americanu, ma semus seguros chi chie si siat at a resèssere a dda bìnchere at a tènnere unu profetu mannu in su tempus benidore.

De seguru est una de is innovatziones destinadas a cambiare su mundu, ma ite at a dèpere fàghere s’òmine dae in antis s’introdutzione contina de s’intelligèntzia artifitziale in sa vida sua?

Su consìgiu nostru est de abarrare agiornados e a su passu cun is tempos, ma impreende totu cun sabiduria, donende cura massimamente a is prus giòvanos.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22