Denùntzia e secuestru de sa màchina, custu est acontèssisu a un’automobilista chi in Asti est istadu firmadu guidende una Ferrari. No est sa prima bia chi càpitat, però unu fatu che a custu at ispantadu a totus, sende chi  una persone di nche andet a periddu cun un Toyota trassada de Ferrari 430 pendende chi nemos si nde acatet est de macos a beru.

Mancari gasi est sutzèdidu. Nch’est chie s’ispàssiat a trasformare sa màchina cun apòsitos kit, e lu faghet in manera legale, ma b’at peri chie imbetzes, cambia totu sa carrotzeria de su veìculu, trasformendelu in un’àtera màchina. Custa est una cosa chi non si podet fàghere.

Sa Guardia de Finàntzia de Asti at iscobertu un’automobilista a sa ghia de una Ferrari F430 frassa, realizada in modu artigianale. Sa vetura est istada secuestrada e su ghiadore denuntziadu. Si tratat de unu giòvanu astiganu de 26 annos, firmadu in unu postu de blocu de sa Guàrdia de Finàntzia pro unu controllu.

Sos finantzieris in deretura ant bidu chi calicuna cosa no torraiat. Pro ite sa màchina assimbigiaiat a una Ferrari  F430, ma dae sos documentos fiat in realidade una Toyota MR2 Coupè. Su giòvanu de Asti, in est istadu denuntziadu dae sa Guardia de Finàntzia. Difatis at sostituidu totu sos logos, sos istemmas e sas partes mecànicas originales de sa màchina cun àteros psìmiles a sos de sa Ferrari. At cambiadu fintzas su còfanu anteriore e cuddu posteriore, sas rodas e sas pintzas de sos frenos, su volante e sos passarodas.

Sa màchina a una prima mirada pariat a beru una F430, chi sa domo de Marranello at prodùidu dae su 2004 a su 2009 cun design Pininfarina. Una contrafatzione realizada a règula de arte chi est istada cunfirmada fintzas dae sos peritos chi ant peritziadu sa màchina a pustis de su firmu. Sa Guàrdia de Finàntzia at provididu a su secuestru e a sa denuntzia de su propietàriu a sa Procura de Asti pro impreu de màrchios de fàbrica registrados sena  autorizatzione.

“Progetu finantziadu cun s’Avisu Pùblicu IMPRENTAS annualidade 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22