Tudadu pro 2300 annos suta su ludu e  s’abba cagente de sas bartzas sacras, est essidu a pìgiu in custas dies in Toscana unu depòsitu votivu de 24 istàtuas chi at a fàghere torrare a iscrìere s’istòria.

Intre sas 24 istàtuas in brunzu de fatura rafinada meda, b’at un’efebo cordadu subra de su fundu de sa  bartza manna de època romana, Igea, sa dea de sa salude chi fiat istada fìgia o mugere de Asclepio, una colovra allorogada subra de su bratzu. Pagu prus addae, galu afundadu dae s’abba, si podet iscerare Apollo e posca àteras divinidade, matronas, pitzinnos e imperadores. Sunt abbarradas prus de duamìgia annos interradas in su ludu e in s’abba cagente de sas bartzas sacras, e a pustis de unu traballu de iscavu cumentzadu in su 2019 sunt torrada a essire a campu a  San Casciano dei Babni in Toscana. 24 istàtuas in brunzu, chimbe de sas cales artas belle unu metru, totus intreas e in istadu de cunservatzione perfetu.

“Un’iscoberta chi at a torrare a iscrìere s’istòria e subra de sa cale sunt giai traballende prus de 60 espertos de totu su mundu”, at naradu in anteprima a s’Ansa s’archeòlogu Jacopo Tabolli, giòvanu dotzente de s’Universidade pro Istràngios de Siena, chi dae su 2019 ghiat su progetu cun sa cuntzessione de su ministeru de sa Cultura e s’amparu fintzas econòmicu de su piticu comunu.

Un’ascusòrgiu ùnicu a beru e de grandu valore, at sutaliniadu Tabolli, chi s’acumpàngiat a un’incredìbile cantidade de iscritziones in etruscu e in latinu e a su cale s’agiunghent mìgias de monedas ultres a una sèrie de ateretantas ofertas vegetales interessantes meda. Su ministru de sa Cultura Gennaro Sangiuliano at giai bisitadu su laboratòriu de restàuru chi dae pagu at acollidu sas istàtuas: “Un’agatamentu etzetzionale chi nos cunfirmat una bia de prus chi s’Itàlia est unu paisu fatu de ascusòrgios immensos e ùnicos. S’istratificatzione de diversas tziviltades est un’unicum de sa cultura italiana”.

“Progetu finantziadu cun s’Avisu Pùblicu IMPRENTAS annualidade 2021-2022”

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22