Sa vida de Olivia Newton-John, morta a 73 annos, est istada istraordinària comente  sa carriera sua, a traessu de chimbe deghènnios, dantzende e cantende: mùsica diferente meda, istiles diferentes meda, cun sa costante de su talentu suo e de sa sintzeridade sua, illuminende cun s’abbistesa sua sos sèberos artìsticos prus diferentes.

Su pop sentimentale de “I Honestly Love You” chi l’aiat fata connòschere, belle pitzinnedda, a su mundu; su country (incredìbile ma beru) de “Let Mene Be There,” sa nostalgia annos ‘50 de “Grease” a in antis chi sos annos ‘50 torrarent de moda, sa mùsica discu, su clàssicu hollywoodianu annos ‘40 cun Gene Kelly in “Xanadu”, su rock de “Magic”, s’aeròbica de “Physical” e gasi sighende, finas a sa reghente “residency” de tres annos in Las Vegas, unu cuntzertu a pustis de s’àteru de sas suas “greatest hits”.

Teniat su donu de sa ligeresa, de èssere capassa de fàghere cosas diferentes meda, pretzedende a Madonna, a Kylie, a Beyoncé ea  Lady Gaga e totus sas àteras a sas cales aiat inditadu su caminu.

Teniat su talentu ispetziale de fàghere pàrrere fàtziles sas cosas impossìbiles, comente a nos fàghere sorridere fintzas cando aiat naradu chi su tumore fiat torradu a pustis de trinta annos ma aiat agiuntu deretu chi paris cun issa bi fiant «su maridu mègius de su mundu e sa fìgia mègius de su mundu, e su zoode gatos, canes, caddos (de pitzinna cheriat fàghere sa veterinària,)». Fiat ùmile meda, mancari sos 100 milliones de discos bèndidos, sena contare sos milliones de amigos in totu su mundu chi la istimaiant  fintzas sena l’àere mai connota, e chi ischint un’àtera Olivia Newton-John non nche at a èssere prus.

“Progetto finanziato con l’Avviso Pubblico IMPRENTAS annualità 2021-2022”

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22