Sunt sas 06.15 de su merie cando unu de is residentes de su villàgiu de su Cala Luas, elegante istrutura de Cardedu incrarada subra de sa costa orientale de s’Ogliastra, si nd’est sapidu chi in sa piscina bi fiat su corpus de unu pipiu a pillu de abba, immòbile e cun sa cara girada conca a su fundu.

Momentos de agitatziones sos chi ant pretzèdidu sa tragèdia de eris a merie, cun sos bagninos chi nde ant bogadu su piseddu foras de sa piscina e dd’ant praticadu su massàgiu cardìacu, mentras sos gestores de su cumplessu turìsticu ant mutidu in dereura sos sucursos de su 118.

Su coro de su pipiu sighet a tzocheddare, meda ma su piticu non s’ischidat mancu cando arribbant sos mèigos cun s’elicòteru de s’Areus, decolladu dae Terranoa e aterradu a sas 18.50. A pustis de un’ora de tentativos sos dotores donant sa noa mala a sos babbose a sa sorrighedda de su piseddu: non s’est sarbadu.

Segundu su chi nde essit a campu dae una prima ricostruzione fata dae sos incuirentes chi sunt indaghende pro cumprèndere conìmente siat andadas sas cosas, su pipiu mentras fiat gioghende in sa piscina su diat tènnere bufatu abba chi diat pòdere àere provocadu unu laringospasma e de cunsighèntzia sa pèrdida de su sentidu. Ma diat pòdere fintzas èssere istadu corfidu dae unu malore.

Sos carabineris de sa cumpangia de Jersu chi sunt arribbados in su vullàgiu, ant regortu totu sas testimonias de sos presentes e est dàbile chi intre oe e cras su magistratu incuirente, chi at abertu unu fascìsculu de indàgine, cunferat s’incàrrigu a unu mèigu legale pro protzedire a s’autopsia. Eris sero su mortu est istadu leadu a s’obitòriu de s’ispidale Sennora Nostra de sa Mercede de Lanusè.

 “Progetto finanziato con l’Avviso Pubblico IMPRENTAS annualità 2021-2022”

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22