A 107 annos at superadu bene un’operatzione de apretu dèvidu a un’oclusione de s’istentina. Est s’istòria de mannoi Giovanni, nàschidu in su 1915, assistidu dae s’iscuadra de Chirurgia de s’ispidale Don Tonino Bello de Molfetta, dirìgida dae su dotore Stefano Camporeale.

Prima s’arribu a su Prontu Sucursu a Corato, tzitade de residèntzia, acanta sunt istadas esecutadas sas valutatziones clìnicu-istrumentales preliminares chi ant cunfirmadu sa diàgnosi de ostrutzione mecànica de s’istentina, posca sa protzedura de trasferimentu in s’Ispidale de Molfetta, pro sa possibilidade cuncreta de dèvere intervènnere in manera chirùrgica cun apretu. In mesu, a agravare galu de prus sos arriscos elevados meda pro su malàidu, s’est agiunta sa positividade sua a su Covid-19.

“Nointames s’arriscu artu cardiològicu e anestesiològicu, – ispiegat su dotore Camporeale – sas cunditziones clìnicas e sa prus chi cuncreta possibilidade de evolutzione pegiorativa cun agravamentu de sa prògnosi, no ant lassadu alternativas terapèuticas bàlidas a s’iscuadra operatòria, chi duncas detzìdidu pro su tratamentu chirùrgicu de apretu. S’interventu est comintzadu a tardu sero, a sas 22,15, e est istadu portadu a in antis bene dae sos dotores Pomarico e Sciannamea chi, in pagu tempus, ant risòlvidu s’ostrutzione mecànica pegiorada dae aderèntzias peritonealis de s’istentina. Fundamentale – contina Camporeale – est istadu su suportu de s’iscuadra anestesiològica dirìgida dae sa dottoressa Gadaleta, cun sa presèntzia in su campu de sas dotoras Arangiolu e Sorrentino e de totu su personale infermierìsticu e ausiliàriu de sala operatòria”.

“Su malàidu – at naradu su dotore Camporeale – at concruidu in modu favorèvole sa prima fase de s’iter terapèuticu. Bastat a pessare chi cale si siat interventu, mescamente de chirurgia majore e ancora prus in raros casos comente a custu tratadu, cumportat  arriscos agiuntivos respetu a un’interventu programadu e cun apreparatzione preliminare deguada. In particulare, posca, sussistiat unu fatore de arriscu non tzertu comunu comente s’edade ultratzentenària de su malàidu». «Ma s’atu pretamente chirùrgicu no est, in custos casos, s’ùnicu ostàculu de superare – at sighidu su chirurgu – essende cussa postoperatoria sa fase prus delicada”.

Fintzas su percursu sutzessivu, duncas, pro mannoi Giovanni s’est riveladu prenu dificultade. Comente si siat at afrontadu e superadu graves complicatziones cardiològicas e renales, tratadas e risòlvidas cun s’ausìliu de sos cardiòlogos e nefròlogos de s’Ispidale molfetesu, finas a sa ripresa definitiva de sas funtziones cognitivas e de unu livellu de autonomia sufitziente, chi at permìtidu de firmare sas dimissiones de su betziteddu e de colare sa cunvalescièntzia in domo sua.

 “Progetto finanziato con l’Avviso Pubblico IMPRENTAS annualità 2021-2022”

Totu s’Itàlia in piatza po sa Palestina: medas abberu cussos chi ant manifestadu in totue. Solu in Casteddu fuint 15 miza.

In custas ùrtimas dies in Itàlia b’at istadu manifestatziones e isciòperos meda po sa Palestina. In tzitades meda sa zente est andada a manifestare cun su finis de chèrrere s’agabbu de sas mortes in Gaza, ube bi morit zente de donzi edade, mescamente pitzinnos de naschidorzu, e su riconnoschimentu de sa natzione de sa Palestina. Su 22 de capidanni de ocannu est istada una die de importu mannu: in Itàlia b’at istadu pius de 75 manifestatziones in aterentantas biddas e tzitades. Sa zente a ziru po custa cosa fuit meda: si narat chi esserant 100.000 persones.

De totu sas tzitades, tocat de montovare a Milano, Venètzia, Torino, Bologna e Roma, inube sos istudiantes e sos troballiantes ant prenadu piatzas e carrelas, zughinde in manos sa bandela de sa Palestina e cussa de sa paghe, fata de sos colores de s’arcu de chelu. In Sardigna sa manifestatzione pius manna l’ant fata in Casteddu, ube b’aiat 15.000 persones. B’at istadu zente meda puru in Terranoa, in Nùgoro, in Tàtari e fintzas in Aristanis.

Custas manifestatziones ant dadu abolotos e problemas puru, mescamente in sas corrieras e in sos trenos, ma puru in sas iscolas, chi fuint serradas. In portos meda, comente in Gènova e in Livorno, b’at istadu carchi malumore, ca triballiantes meda non b’ant triballiadu. Su peus est sutzessu in Milano e in Roma, inube carchi macu at imboladu fumògenos e àteros trastes, cun su finis de fàghere burdellu. B’at de nàrrere, però, chi su pius de sas tzitades at manifestadu in paghe e cuncòrdia, rispetande sa leze e pedinde a boghe arta e cun seru mannu chi custa gherra in Gaza potat finire e chi siat riconnota dae totus sa natzione de Palestina.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22