Lutu in Nùgoro pro sa morte de su cussigeri comunale Michele Siotto. Dae annos lutaiat contra unu male malu. Si nd’est andadu a s’edade de 50 annos.  Pro diversos annos est istadu unu càrdine de su grupu polifònocu “Su Nugoresu“, dirighendelu prus de una borta cun su ruolu de presidente.

“In custos annos de cussigeri comunale s’est ischidu distìnghere pro sa fortza e sa gana de fàghere sua, pro s’aficu totale suo finas a sa fine, nointames su male feu l’istaret papende a pagu a pagu, l’at semper afrontadu de petorras e no at mai fatu mancare sa presèntzia sua. Est istadu unu gherreri sena pasu – l’ammentat su sìndigu, Andrea Soddu -. Fiat unu gherradore. Finas a s’ùrtimu at lutadu. At lutadu pro sa tzitade sua. Amoradu de Nùgoro e de sa Sardigna, creiat in su chi faghiat, in sos talentos de sa tzitade e de sa terra sua. Su Cussìgiu comunale perdet una figura manna, s’esèmpiu suo siat de ispiratzione pro totus nois. Totu s’amministratzione s’istringhet in unu abbratzu calorosu a sa mugere, a sas fìgias e a sos familiares totus”.

Ma fintzas in Nùgoro medas tzitadinos, fintzas chie non lu connoschiat, est abarrada corpida meda dae custu lutu.   Su cussigeri comunale Michele Siotto  fiat una colonna e cumponente, dae prus de bint’annos de su Coro Su Nugoresu. Siotto s’est impinnadu totu sa vida sua in sa valorizatzione de sas traditziones populares de Nùgoro. In sos ùrtimos annos, s’est impinnadu in manera ativa in sa vida polìtica tzitadina: cussigeri comunale in càrriga in sa majoria de su sìndigu Andrea Soddu, lu fiat istadu fintzas in in su mandadu coladu de su matessi sìndigu. In sos ùrtimos meses, at lotadu pro sa defensa de sos malàidos oncològicos cun s’assòtziu Vivere a colori,  de su cale fiat sòtziu fundadore.

Una pèrdida manna non solu pro sa polìtica e pro s’assotziatzionismu, ma fintzas pro sa cultura nugoresa, cho perde unu ponteddu de bàlia e unu faru de riferimentu importante.

 “Progetto finanziato con l’Avviso Pubblico IMPRENTAS annualità 2021-2022”

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22