Un’eventu abetadu dae tempus e bìvidu cun grandu fide siat in su comunu barbaritzinu siat in s’intrea Diòtzesi de Nùgoro.

Sa grandu tzelebratzione, s’est tenta a sas 10 locales, a pagu tretu dae su logu in ue fiat acontèssidu su martìriu. Unu caminu longu 340 annos, su de sa proclamatzione ufitziale de sa beatificatzione.

Abetadu fintzas s’annùntziu de banda de su pontìfitze, Papa Francesco chi in su protzessu longu meda pro arribbare a su traguardu de sa beatificatzione at tentu unu ruolu importante meda cando fiat gale cardinale Bergoglio.

Su momentu de sa proclamatzione est istadu bìvidu cun grandu emotzione dae una pitica delegatzione sarda ghiada dae su pìscamu de Nùgoro e Lanusè, Missennore Antonello Mura.

Cun sos religiosos una rapresentàntzia significativa de sa bidda Ulìana, ghiada dae su sìndigu Sebastiano Congiu.

“Est de importu mannu e una grandu emotzione pro mene su de  èssere inoghe oe in rapresentàntzia de sa comunidade de Ulìana, bidda nadale de Giovanni Antonio Solinas. Pro sa comunidade nostra oe est una die ispetziale, de grandu cuntentesa chi cumpartzimus cun brègiu paris cun su pòpulu argentinu, in ocasione de sa beatificatzione de sos duos màrtires padre Giovanni Antonio Solinas e padre Pedro Ortiz. Torro gràtzias a su pìscamu nostru pro s’oportunidade chi m’at dadu de bènnere inoghe paris cun totu su grupu de pellegrinàgiu, e unu ringratziamentu andat fintzas a sa gente chi nos at retzidu inoghe in Argentina, pro s’afetu issoro in sos cunfrontos nostros, su garbu e s’entusiasmu sentidu a beru. Unu pensamentu ispetziale andat pro fortza  a totu sa comunidade de Ulìana chi est sighendenos cun emotzione dae domo, ma cun su coro inoghe paris cun nois. E pro custu los abbratzo totus, unu a unu”, at naradu su primu tzitadinu.

Cuntentos mannos sos fideles de sa Diòtzesi de Nùgoro chi como tente tres biados, a pustis de Antonia Mesina de Orgòsolo e Maria Gabriella Sagheddu de Durgali e mescamente sa parròchia de Santu Ignazio de Loyola a Ulìana pro su crompimentu de s’obietivu chi calicunu annu a oe pariat belle irrealizàbile.

 “Progetto finanziato con l’Avviso Pubblico IMPRENTAS annualità 2021-2022”

Sa Sardigna de su rennu: unu tempus de autonomia e podere locale in s’ìsula medievale.

S’istòria medievale de sa Sardigna est sinzalada dae unu tempus ùnicu, cussu de sos zuigados, rennos autònomos chi ant caraterizadu s’ìsula intre s’XI e su XIV sèculos. Custos istados pitticcos, nàschidos a pustis de s’abbasciamentu de gadimentu de su podere bizantinu e de sas incurtziones àrabas, rapresentant unu capìtulu de fundamentu pro cumprèndere s’identidade istòrica e polìtica de sa Sardigna.

A pustis de sa fine de su poderiu bizantinu, s’ìsula s’est ispartida in rennos autònomos guvernados dae zùighes, friguras chi auniant funtziones polìticas, militares e zudiziàrias. Sos zudicados fiant ghìados dae famìllias nòbiles locales e si fundaiant subra unu assentu amministrativu e zurìdicu avanzadu pro cussu tempus. A su cumintzu si nche contaiant bator printzipales: su Zudicadu de Casteddu, su Zudicadu de Arbarèe, su Zudicadu de Torres (o Logudoro) e su Zudicadu de Gaddura.

Donzi zudicadu teniat capitale, esèrtzitu, leges suas e una istrutura amministrativa autònoma, chi permitiat de guvernare un’ iscrocca ispartida comente cussa sarda. Su podere de sos zùighes non fiat assoludu: s’azzudaiant cun unu cunsìziu de nòbiles e funtzionàrios locales chi los azuaiant a leare detzisiones.

Sa leze iscrita, connota comente Carta de Logu, mescamente in su Zudicadu de Arbarèe, regulaiat sa vida polìtica, econòmica e sotziale, istabilinde reglas tziviles e penales e amparande sos diritos de sos tzitadinos. Custu còdighe legale fiat un’istrumentu avanzadu pro cussu tempus e at influentzadu sa legisladura sarda in sos sèculos a pustis.

Sos zudicados, puru essende indipendentes, non ant bìvidu mai isulados: sas bèndidas issoro fiant ligadas a s’istrinta  a sas potèntzias de su Mediterràneu, comente Pisa, Gènova, Aragona e su Papadu. A mesu de alliantzas, cojas e gherras, ant chircadu de deffèndere s’autonomia insoro e de affortigare su podere locale.

Intre totus, su Zudicadu de Arbarèe s’est distìntu pro sa resistèntzia a sas dominatziones istranzas, in particulare in su mentres de sa luta contra de sos aragonesos in su  sèculu XIV.

S’abbasciamentu  lentu  de sos zudicados at cumintzadu cun s’abbattigu de fora e cun sas lutas intro de issos. A sa fine de su sèculu XIV, s’Aragona est resurtada a cunchistare sa parte pius manna de s’ìsula, annetende sos territòrios de sos zudicados e revertinde sa Sardigna in una regione suta su controllu aragonesu. Comente si siat, sa memòria de sos zudicados e de sas lezes insoro est abarrada biva in sa cultura e in s’istòria locale.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”