Una serada ispetziale in su Teatru comunale chi dae prus pagu de un’annu est intituladu a sa cantautora e atoressa naschida a Siligo. Unu regalu a sa grandu artista sarda cun filmados, mùsica, càntigos, poesias e ammentos.

Sa serada, conduida dae Giuliano Marongiu, at a bìdere sa partetzipatzione de amigos istòricos de Maria Carta: sa musitzista Anna Maria Puggioni, sa poetissa Clara Farina, sa cantautora Maria Luisa Congiu e s’iscritore Emanuele Garau. Sunt prevìdidos sos contributos de sa cantante Sandra Ligas e de s’atoressa Elisa Pistis. Inviatados de sa serada s’iscritore e poeta Biagio Arixi e su Presidente de sa Fundatzione Maria Carta.

S’eventu est organizadu dae Comunu de Su Masu e dae su Coordinamentu Proloco de Su Masu e Memorias cun su patrotzìniu de sa Fundatzione Maria Carta e sa Diretzione artìstica de Emanuele Garau.

S’ispetàculu at a cumentzare a  oras de is 20.45. Sas prenotatziones pro leare parte a s’ispetàculu ant a pòdere èssere fatas imbiende unu messàgiu whatsapp o telefonende a su nùmeru de sa Proloco de Su Masu 3284461675 dae sas 18:00 a sas 20:00.

Custa sa dèdica chi s’iscitore Giuseppe Dessì, in sa presentada de s’album Delirio de su 1974, aiat dedicadu a s’atoressa famada.

«Su bella cara sua, sa fieresa paris cun sa gràtzia de su portamentu suo, prus chi unu sìmbulu, sunt una personificatzione de cudda Sardigna immateriale e areste chi apo semper amadu. Cando sa boghe caente sua e balente s’àrtziat e prenat s’ispàtziu, s’aberint orizontes infinidos chi falant a s’istòria. A pustis de àere connotu Maria Carta, torro a nàrrere chi sos òmines mannos de sa Sardigna sunt istadas fèminas.»

 “Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22