“Mi muto Benjamin, apo furadu unu cocoeddu de tziculate in su butega sua. Mi dispraghet meda, aco’ 10 èuros. Ispero mi potzat perdonare”. Cumintzat gasi sa lìtera de iscusas iscrita dae unu piseddu isvìtzeru, Benjamin pro s’apuntu, indiritzada a su maere de una butega alimentare de Santu Marinu. Su piseddu de 12 anno, pentidu de sa fura, at fatu cunsinnare sa missiva a su cummertziante, Danilo Chiaruzzi, cun una banconota de deghe èuros pro pagare sa cosa furada, “pro mi fàghere perdonare”, at bòlidu pretzisare.

Sa lìtera. Una cunfessione chi non t’isetas. Epuru Benjamin, nointames sa giòvana edade, at dimustradu unu sentidu de responsabilidade forte, cusciente de àere cummìtidu unu piticu illètzitu: sa fura de unu cocoeddu Kinder. Gasi at pedidu iscusa a su gestore de sa butega de Santu Marinu in ue, calicuna chida a oe, est istadu in gita cun s’iscola. “Domìniga su 30 maju – iscriet su piseddu – sunt intradu a su butega sua e sigomente non tenia dinare, apo furadu unu cocoeddu Kinder. Apo isballiadu, l’isco e pro custu li chèrgio dare 10 èuros pro mi fàghere perdonare”.

Sa reatzione. Sas paràulas de su piseddu ant cummòvidu su titulare de sa butega chi at detzìdidu de publicare su testu de sa lìtera in Facebook. “Oramai non m’ispantat prus nudda, – iscriet Chiaruzzi – cun su chi amus coladu in custos annos, ma oe mi so torradu a crèere. M’est arribbada una racumandada dae s’Isvìtzera, iscrita a manu, cun in intro una banconota de 10 èuros comente alìtera de iscusas dae banda de unu babbu chi mi m’at cunfessadu comente su fìgiu suo, durante una gita, mi diat àere f unu cocouradueddu  Kinder. La diant dèvere lèghere pitzocos medas chi ogni die, pro giogu o pro disafiu, mi furant patateddas e caramellas o àteru”.

Sa risposta. Chiaruzzi at naradu chi li diat fàghere pràghere connòschere su piseddu e sos sos babbos. “Apa a rispòndere a su pitzocu cun una cartulina – at promìtidu – o mancari cun una lìtera e l’apo a invitare a torrare a zona nostra. Li chèrgio istrìnghere sa manu, mi paret su mìnimu”. Su post at otentu chentinas de mi praghet e at generadu ateretantos cummentos. “Una lìtera chi faghet bene a su coro”, at iscritu unu letore. Un’istòria “chi apo a contare a sos iscolano meos. Esistent galu persones bonas”, est istadu su cummentu de un’insegnante.

 “Progetto finanziato con l’Avviso Pubblico IMPRENTAS annualità 2021-2022”

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22