Su calleddu nche fiat rutu a intro de unu canale de iscolu de s’abba pròina e arriscaiat de mòrrere allupadu. Ditza sua est istadu bidu dae un’iscuadra de operajos chi fiat traballende a presu de su riu e l’ant sarbadu a pustis de un’operatzione de sarbamentu ispetaculare.

Un’istòria chi a sa fine est andada bene gràtzias a s’interventu de unos cantos operajos de unu cantieri edile chi fiat traballende a presu de su riu. Sunt istados custos a intervènnere deretu atirados dae sos tzàulos disisperados de s’animale chi oramai fiat mesu ibèrghidu dae s’abba e dae su ludu de su canale. Sas fotografias e su vìdeu de su singulare sarvamentu sunt devènnidos virales: difatis sunt istados cumpartzidos milliones de bortas in totu su mundu, prenande sos muros de totu sos mèdia sotziales. Un’istòria chi at tentu unu finale chi at cummòvidu su mundu.

Ma andamus a bìdere sas fotos. In sas immàgines chi ant fatu literalmente su giru de sa retza, mustrat unu cane sarvadu dae unos cantos operajos cun sa pala de un’escavadore, a pustis de chi s’animale at arriscadu de mòrrere afogadu intre sas abbas de unu riu in Ecuadòr. Unu de sos operajos, in particulare, s’est sèidu intro sa benna de su mesu mecànicu de traballu e s’est fatu calare dae sos collegas cara a su riu, pro pòdere agiuare su cane a intrare a intro de sa pala. Su cane, sarbadu, est istadu portadu in deretura dae su veterinàriu pro sas bisitas mèdicas e pro bona sorte sua immoe istat bene. Sa fortuna de su cane est istada cussa de èssere istadu bidu pròpiu dae operjos chi aiant a disponimentu s’escavadore cun su bratzu mecànicu bastante longu de arribbare finas in intro de su canale, permitende a sos òmines de sarbare s’animale. Ma prus che totu sa fortuna sua est istada sa de àere agatadu òmines cun amantiosos de sos animales chi ant tentu su bonu coro de nche lu bogare dae su riu acanta nche fiat rutu.

Inoghe a suta sa fotografia e su vìdeu de su sarvamentu chi sunt devènnidos virales in rete.

 “Progetto finanziato con l’Avviso Pubblico IMPRENTAS annualità 2021-2022”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22