Sos grogo-rujos binchent in domo contra s’iscuadra inglesa, su 25 de maju sa finale a s’Arena Kombetare de Tirana.

Conference league: Sa Roma binchet su Leicester in domo 1-0, cun gol de Abraham a su 11′ de su primu tempus e andat in finale contra su Feyenoord. Su 25 de maju su disafiu, in s’Arena Kombetare de Tirana, in Albania. Sos olandesos giogaiant sa semifinale in domo de su Marsìllia ma sunt resèssidos a mantènnere sa partida in su 0-0 (aiant bintu contra sos frantzesos 3-2 in sa partida de andada).

Unu aplàusu longu e coros pro Claudio Ranieri a s’Olìmpicu durante sa ripresa de Roma-Leicester, chi est istadu allenadore de ambas sas iscuadras. Cun sos inglesos aiat bintu sa prima Premier League de s’istòria de s’iscuadra inglesa: est istadu incuadradu subra de sos maxischermos de s’istàdiu e s’est artziadu a ringratziare su pùblicu, cummòvidu pro su sinnu de istima de ambas sas tifoserias.

Pro ammentare una finale europea de sa Roma tocat a torrare a 31 annos a oe cando sos grogo-rujos partetzipaiant a sa Copa Uefa, e s’iscuadra fiat arribbada a si giogare su trofeu contra s’Inter de Trapattoni. Su mègius de sa serada s’atacante inglesu Tammy  Abraham, chi at realizadu su gol chi balet sa finale, cun unu corp de conca.

Sos romanos conchistant sa de bator finales europeas de s’istòria issoro, in bator cumpetitziones europeas diferentes, a pustis de cuddas otentas in Copa de sas Fieras, Copa Campiones e Copa Uefa.

Sa Roma cumentzat bene, ispinta dae s’Olìmpicu prenu de ispetadores, a su 8′ Pellegrini cun punitzione iscudet diretamente in porta, cun Schmeichel chi mandat sa botza a s’àngulu, cun unu pagu de fortuna. Grogo-rujos chi nche proant torra unu minutu a pustis de, cun Zaniolo chi passat a Zalewski in sa fàscia oposta: esternu romanu chi intrat in àrea e serbit a Pellegrini, chi cun una deviatzione mandat sa botza in corner.

Ma sa Roma insistet e a s’11’ colat: Pellegrinos iscudet dae s’àngulu e Abraham cun unu corpu de conca dae s’àrea pitica brincat a  Schmeichel pro su 1-0.

Su Leicester proat a reagire deretu cun unu tiru de Dewsbury-Hall, chi però finit largu meda a sa dereta de Rui Patricio.

S’iscuadra de Mourinho contina a ispìnghere e a su 17′ Zalewski passat a Pellegrini, chi iscudet cara a Schmeichel: su danesu est atentu e resesset a deviare. Sos inglesos artziant su baritzentru de s’iscuadra, e sa Roma proat cun sos contratacos: a su 32′ Abraham puntat su tzentru de s’àrea – botza in sos pees – posca aberit pro Zaniolo a sa dereta sua. Su nùmeru 22 càrchidat cara a sa porta ma agatat una deviatzione in s’àngulu.

Sos romanos abbassant unu pagu su ritmu – cun Mourinho chi abòghinat dae sa  banchita – e su Leicester proat a fàghere sa partida, ma non resesset a lòmpere a sa porta de Rui Patricio.

Su segundu tempus. Rodgers faghet sos càmbios cun unu Leicester prus ofensivu.

A sa 46′ titifrius pro sos inglesos cun Evans chi pro pagu non marcant, ma Schmeichel devia sa botza  iscuta  dae sa bandierina de Pellegrini.

Sa Roma sufrit s’assetu nou de sos aversàrios, Justin chircat de serbire a Vardy a tzentru àrea ma sa difesa romana si sarvat in s’àngulu.

S’iscuadra de  Mourinho non resesset a portare sa botza a in antis ma puntat meda in su contratacu.

A su 54′ Abraham, a palas de sa defensa inglesa, tocat sa botza cun su bratzu in s’intrada in àrea.

A sa 57′  Dewsbury-Hall chircat sa ghenna cun su pee mancosu, ma sa botza acabat in sa lìnia.

Pagu a pustis Maddison iscudet rasuterra e  agatat a Vardy lìberu in àrea: su nùmeru 9 inglesu càrchidat cun su deretu ma agatat a Abraham chi firmat s’atzione cun sa conca: su Leicester tenet sa botza ma sa Roma proat a si nde la leare e in una de custas ocasiones Karsdorp istupat a palas de Justin in unu tiru pro Pellegrini dae sa lìnia de metade campu, ma sa botza acabbat in s’àngulu.

Sos inglesos proant cun concrusiones dae tesu, prima cun Maddison, e posca cun Iheanacho, ma Rui Patricio blocat totu sena pensamentos.

A su 92′ Maddison assustat sos grogo-rujos chi a su 95′ arriscant de raddopiare cun Oliveira, Schmeichel si sarvat in corner: ma est  s’ùrtima atzione e  s’àrbitru frùschiat sa fine.

 “Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22