Serradu dae 11 annos, s’aeroportu de Tortolì diat pòdere torrare a abèrrere tra pagu. A pustis de s’addòbiu reghente in Regione cun s’assessore regionale a sos Trasportos Giorgio Todde e una videocunferèntzia cun sos dirigentes de Upper Sky-Grupu Aliparma, sa possibilidade de fàghere mòvere s’iscalu sardu est semper prus cuncreta.

Sa sotziedade operadora in su servìtziu de sos trasportos aèreos pro clientes millionàrios s’est mustrada interessada a su benidore de s’aeroportu e a sas rechestas de su Cunsòrtziu industriale provintziale Ogiastra, sòtziu ùnicu de sa sotziedade mere de s’istrutura AliArbatax. A s’ùrtima riunione ant partetzipadu su presidente de su Cunsòrtziu industriale, Franco Ammendola, s’amministradore ùnicu de s’Upper Sky-Grupu Aliparma, Giancarlo Insinna, su diretore generale de Aliparma, Mauro Izzacani, e s’assessore Todde.

Su benidore de s’aeroportu de Tortolì diat pòdere èssere cussu de bolos ispetziales de lussu o cussu, comente espressadu dae su Cunsòrtziu, de intzentivare su turismu locale. Si tratat galu de una partida aberta, mancari sa tratativa siat a unu bonu puntu. Ancora no est istadu firmadu perunu cuntratu, ca no est istada galu istabilida sa destinatzione de impreu. Mancari gasi però, si pensat a s’oportunidade chi diat pòdere donare pro s’isvilupu de su territòriu, una possibilidade chi s’iscalu diat pòdere ofèrrere e est custu chi punnat su Cunsòrtziu.

Sa firma de unu possìbile atu notarile at a serbire a pònnere in evidèntzia totu sos puntos subra sa finalidade de s’aeroportu. Si faeddat de dare importàntzia a s’isvilupu de s’economia locale: bidditzolos e istruturas turìsticas in gènere. Una bia cròmpidos sos acòrdios verbales s’at a riunire unu grupu de espertos pro averguare sa fatibilidade de su progetu subra de su pranu giurìdicu. Prima ancora, però, abarrat de isòrvere su nodu de s’Enac chi diat dèpere rispòndere intro su 21  de martzu subra sa rechesta de emissione de s’autorizatzione a s’aviatzione generale, cun sa riapertura a su tràficu de die de sos aeroplanos privados, veìculos finas a sas 5,7 tonnelladas e màssimu 12 passigeris. Posca at a bènnere presentada sa recherta pro s’autorizatzione a s’aviatzione tzivile pro sos bolos turìsticos ispetziales finas a 100 passigeris. E est a custu chi punnat su Cunsòrtziu industriale pro fàghere torrare a mòvere s’economia de s’Ogiastra.

 “Progetto finanziato con l’Avviso Pubblico IMPRENTAS annualità 2021-2022”

Coldiretti Casteddu, at fattu una proposta apprettosa a sos sindigos de sa Sardigna de su mesudie orientale: dimandare sa utta de calamidade naturale po cajone de s’assuttura grae meda chi est devastande s’iscrocca dae paritzos meses.

Custu appellu est bistadu fattu cun d’una littera mandada a sos primos tzittadinos de 25 Comunes de cussa zura, cun s’intentu de bischidare sas comunidades e alcansare unu accottu praticu. In sa littera mandata, su presidente e su direttore de Coldiretti Casteddu, Giorgio Demurtas e Luca Saba, evidentziant sa drammaticidade de sa situassione chi est imbrinucande sos massajos e sos pastores de sa regione.

Sa mancantzia de s’abba po parizzu tempus at cajonadu una crisi chi non tenet cabidianu, cun dannos mannos meda a sa laurantza e a sas attividades de allevamentu. Addaenantis a custa emergentzia, Coldiretti evidentziat s’importantzia de si interessare a sa lestra e cun detzisione, uninde sas fortzas cun sos sindigos de sos Comunes interessados, po apprettare sa Regione a declarare sa utta de calamidade naturale.

Sigundu Coldiretti, declarare sa utta de calamidade est necessariu po alcansare sos benes chi serbint a su sustentamentu de sas comunidades de sa campagna e sas attividades de produssione insoro, chi sunt bistadas accroppadas meda dae una crisi chi paret non dare asseliu. Sos massajos e sos pastores, chi sunt sos colondos de sas comunidades locales, sunt in d’una situassione critiga meda, cun meda problemas de colomia de oe e de cras.

In manera particularee, sa zura de sa Sardigna de su mesudie Orientale est bivinde una situassione critica, cun meda pastores chi teppent acomettare dannos dae s’assuttura e problemas po comporare sa provenda po cumpensare sa mancantzia de sos appassiadorzos. Custu at cajonadu cunseguentzias chi ant devastadu sos fatturados de sas dittas. Coldiretti, narat de tennere cunfiantza in sa sensibilidade de sos sindigos e dimandat una assione lestra meda dae parte de sas istitussiones po azzuare sas dittas in custa situassione drammatiga meda.

S’organissasione addurat disposta a dare sa collaboratzione sua a tottu sas amministrassiones chi anta a partetzipare po s’interessiu e su benessere de sas comunidades locales. Sos pensamentos po su motivu chi sa situassione potat diventare pius grae, sunt fundadas, tenende in cunsideru puru s’arriscu po sos cultivos de s’istiu e de s’attonzu, pustis de sas difficultades passadas in s’iberru e su beranu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22