Sa cojas est istada tzelebrada in su giardinu de s’ispidale “Il Tulipano” de su Niguarda de Milanu. Sa fèmina, malàida terminale, at isetadu de nàrrere “Eja” a s’amadu suo in antis de si nd’andare pro semper.

At isetadu de nàrrere “Eja” a s’amadu suo, a in antis de lu lassare. At isetadu sa die de su matrimòniu suo, tzelebradu dae su letu de s’ispidale, a in antis de mòrrere. Est s’istòria de Laura, una fèmina malàida terminale, chi at detzìdidu de cojuare s’amore de sa vida sua, Andrea in s’ispidale de su Niguarda de Milanu. Pagas dies a pustis Laura s’est morta.

B’aiat su sole a illuminare sos isposos. Laura, corcada in su letu de s’ispidale, tenet intre sas manos unu matzu de frores grogos. Sabatas de ginnàstica, unu bestidu intre su biancu e su beige, e una corona de frores in conca. Andrea, sètzidu in su letu acanta a s’isposa, portat unu bestire iscuru, camisa asula, e comente e in sa busciaca de sa giacheta unu frore biancu, comente a sos de sa corona in sa conca de Laura.

A tzelebrare sa coja b’at amigos e parentes de sa còpia. Laura, a letu, est istada acumpangiada a su giardinu dae su babbu e de sos infermieris de s’ispidale. Laura est cuntenta, mustrat unu risitu apenat ca bidet a s’isposu suo Andrea chi la fiat giai isetende. Fintzas su babbu – frore biancu in sa busciaca – càstiat s’isposu de sa fìgia. Laura e Andrea ischiant de non tènnere meda tempus a disponimentu, ma ant chertu decretare s’amore issoro pro semper.

Su personale de s’Ispidale Niguarda at publicadu sas fotos de sa coja de Laura e Andrea in Facebook. “Torra sa cura donada a sas persones, malàidos e familiares, afidadas a s’ispidale nostru ‘Il Tulipano’, nos at portadu a tzelebrare s’amore, in custu casu cussu intre Laura e Andrea chi ant seberadu de s’unire in matrimòniu”. Gasi si podet lèghere in su messàgiu cumpartzidu in su Facebook de s’ispidale. “Est semper – agiunghet su personale de su Niguarda – unu momentu emotzionante meda, chi interessat totu s’iscuadra, peri sos voluntàrios. Unu momentu acanta totu su personale s’intendet ‘privilegiadu’ de pòdere acumpangiare, mancari cun  tristura, tapas significativas de sa vida de sos malàidos nostros”.

 “Progetto finanziato con l’Avviso Pubblico IMPRENTAS annualità 2021-2022”

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22