Una fotografia est essida istasero in sa pàgina Facebook de su sìndigu de Silanos, pagu prus de duas mìgia abitantes in provìntzia Nùgoro, Giampietro Arca, at fatu discùtere meda e at atzinnicadu sas cussèntzias subra de sas cunditziones de sa sanidade a su Prontu sucursu de s’ispidale Santu Frantziscu de su cabulogu de sa provìntzia de Nùgoro: unu pitzocu de 16 annos, residente in sa bidda de su nugoresu, est abarradu fuliadu pro belle ses oras subra de unas cantas cadreas de sa sala de su presìdiu de su primu interventu, chi non tenet a disponimentu una lètia e nimancu  personale pro lu pòdere bisitare.

Unu casu chi arribbat comente a unu tzafu a s’incras de sa bìsita in Nùgoro de su sutasegretàriu a sa Salude Andrea Costa, chi est istadu cunvocadu pro chircare de risòlvere sas graves fartas de personale de su nosocòmiu nugoresu.

“Su pitzocu de sa foto s’agatat in su Prontu sucursu de s’Ispidale Santu Frantziscu dae sas 15 de custu merie e est isetende galu de èssere sutapostu a bìsita – at iscritu in facebook su primu tzitadinu – No est istadu possìbile a lu fàghere corcare in una barella ca, segundu cantu referidu dae sos operadores sanitàrios a sos su babbu e a sa mamma, a disponimentu non nche nd’at prus. Su matessi piseddu, martis coladu, fiat arribbadu a su Prontu Sucursu a sas 12.45 e est istadu mandadu a domo sua a sas 3.15 de sa die sighente, a pustis de chi sos mèigos l’aiant diagnosticadu una purmonite. Custu deviat bìdere su sutasegretàriu Andrea Costa! – denuntzia su sìndigu – Naturalmente sas responsabilidades non sunt in atribuire a sos pagos mèigos meda chi giai faghent meda, ma a unu sistema sanitàriu chi devet èssere torradu a acontzare”, at acraridu su primu tzitadinu de Silanos.

 “Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22