Suta secuestru sa màchina de Usmanov de mesu millione de èuros: est a prova de bomba e s’agatat in Sardigna. Segundu su pùblicu registru automobilìsticu, sa màchina,  una Mercedes Maybach S650 Guard VR10, est istada immatriculada “su 6 de mese de làmpadas de 2018 e pagas dies a pustis, su 25 de làmpadas de su 2018 etotu, est istada comporada dae una sotziedade de Altzaghena (Tàtari) a su prètziu de 532.440,16 èuros, importu chi paris cun s’iva nche essit a prus de 600.000 èuros”. Segundu diversos giornales su mezu blidadu diat pòdere apartènnere a s’oligarca russu Usmanov e est dàbile chi cun cussa màchina bi potza àere biagiadu fintzas Putin.

Chie setziat in su setzidòrgiu de fatu de sa Mercedes Maybach finida suta secuestru a pustis de sas santziones in sos cunfrontos de sos benes de sos oligarcas russos? Sa màchina de lussu a proa de bomba est istada individuada in Sardigna, tra Porto Cervo e Porto Rotondo. Comente amus naradu no est una vetura normale, ma una “supercar”. Difatis, a banda su prètziu chi est de prus de 500 mìgia èuros, est a nàrrere prus de mesu milliones de èuros si contamus s’iva, sa màchina podet resìstere a s’esplosione de una bomba o de una granada.  Una vetura de custa genia, segundu sos chi sunt indaghende, diat pòdere serbire solu pro su trasportu de una persone importante meda, comente pro esèmpiu Vladimir Putin,  chi medas bias est andadu a Sardigna pro colare sa bacàntzias in sa domo de s’amigu suo Alisher Usmanov.

E pròpiu s’oligarca russu diat pòdere èssere su propietàriu de una villa de su balore de 17 milliones de èuros chi s’agatat semper in Costa Smeralda chi a su su presente resurtat  “cungelada” pro manu de su Comitadu de seguresa finantziària a pustis de sas santziones contra sos oligarcas russos chi donant coddu a Putin in sa gherra contra s’Ucràina.

 “Progetto finanziato con l’Avviso Pubblico IMPRENTAS annualità 2021-2022”

Morta 30 annos faghet in Casteddu,su cunsillu puntat a unu mortoriu.

Trint’annos pustis de sa morte de Manuela Murgia, sa picciocca de 16 annos acciappida chentza vida in su canyon de su campusantu de Tuvixeddu in Casteddu su 5 de frearzu 1995, sa famiglia sua sighit a chircare veridade e zustissia. In primis si pensaiat chi si esseret morta, ma su casu est bistadu torradu a abberrere su 30 de martu 2025.Como est bistadu presentadu unu cunsillu novu chi negat sas congruidas de su RIS e puntat a cunfirmare chi Manuela diat podere essere bistada bocchida.

Su cunsillu de su Dr. Roberto Demontis, anatomopatologo, si cuntzentrat supra battoro puntos printzipales. Su primu po sas iscanniduras de Manuela:secundu su duttore non podent essere bistadas fattas po una rutta dae 30 metros, comente si pensaiat, e duncas s’idea chi si siat morta est meda diffitzile de creere.

Su secundu puntu pertoccat sa tzintura de sa picciocca: sa fibbia mustra sinzos de tira, comente si calicunu la diat aere tirada, e custu non diat ispiegare una rutta a sa sola. Su terzu puntu pertoccat sos oggettos pessonales de Manuela e carchi pranta acciappida accanta a su corpus: secundu Demontis non sunt coerentes cun su logu in su cale est bistadu acciappidu su corpus, e custu faghet pensare chi che siat bistadu leadu inie.

Po finire, su quartu puntu pertoccat sas iscanniduras intro de su corpus, chi secundu su duttore diant podere essere bistadas fattas cun d’unu imbestimentu de una macchina, abberinde iscenarios divressos meda dae cussu chi si pensaiat. Sa famiglia de Manuela pensat chi custos battoro puntos affortighent s’idea chi sa picciocca siat bistada morta e isperat chi custa analisi nova potat finamente faghere bessire a pizu sa veridade. Su cunsillu est unu elementu importante po faghere lughe supra una muda addurada misteriosa po trint’annos, e evidentziat comente siat ancora oe possibbile revertire pensamentos chi pariant deffinitivos.

Como sa detzisione finale est de su P.M., chi at a deppere baludare si nomenare unu super espertu po controllare un’attera borta su casu e abberguare sas ideas novas. Pro sa famiglia custu diat podere rappresentare unu passu detzisivu po alcansare rispostas, serrare unu capitulu prenu de dolore e dare zustissia a una vida zovana rugada troppu chitzo. S’isperantzia est chi, pustis de trint’annos, Manuela potat finamente tennere sa zustissia chi mereschet.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22