Su comunicadu de s’imprendidore russu: «Apo incarrigadu s’iscuadra mea de creare una fundatzione de benefitzèntzia a sa cale ant a èssere donados totu sos balàngios netos de sa bèndida. Sa fundatzione at a èssere in benefìtziu de totu sas vìtimas de sa gherra in Ucràina»

Roman Abramovich bolet bèndere sas propiedades londinesas suas e mescamente s’iscuadra de fùbbalu de su Chelsea, ca est «preocupadu» — narant in Londra — dae sa possibilidade de èssere corfidu dae sas santziones de su guvernu britànnicu. E duncas mèrcuris sero s’oligarca russu at annuntziadu ufitzialmente sa tzèssione de s’iscuadra londinesa: prètziu, 3 milliardos de isterlinas (prus de 3 milliardos e mesu de èuros). Ma b’at de prus: sos ricavos de sa bèndida ant a andare «a benefìtziu de totu sas vìtimas de sa gherra in Ucràina».

Abramovich, cunsideradu unu de sos òmines prus fideles de Putin — mancari issu neghet — no est istadu postu fintzas a como in sa «lista niedda» de sa Bretagna Manna e de s’Unione Europea: ma a Londra totu sos ogros sunt puntados subra de issu e subra de sas imbenientes mossas de su guvernu de Boris Johnson. Est pro custu chi s’oligarca diat àere giai postu in su mercadu fintzas sa residèntzia sua de Kensington Palace Gardens — narada fintzas «sa bia de sos milliardàrios», acanta a su palatzu de William e Kate e in ue s’agatat puru s’ambasciada russa —: si tratat de una propiedade de 15 aposentos de letu valutada belle 200 milliones de èuro. Agentes immobiliares de lussu diant èssere istados giai mutidos e bi diat àere unu potentziale comporadore tzinesu. Abramovich diat tènnere idea de bèndere fintzas de s’àtera propiedade sua in Londra, una domo de tres pranos a Chelsea comporada in su 2018 pro unos 25 milliones de èuros.

Su passàgiu de su Chelsea a sa fundatzione de benefitzèntzia de s’iscuadra, chi fiat istada bida comente  una mòvida sena unu beru balore legale, como benit bida comente  su primu passu cara a sa bèndida de s’iscuadra. Segundu sos giornales inglesos, bi diat àere giai tres investidores prontos a fàghere un’oferta in chida pro rilevare su Chelsea: ma su tempus istringhet, ca si Abramovich esseret corfidu dae sas santziones, s’afare si diat rivelare difìtzile de andare in portu.

“Progetto finanziato con l’Avviso Pubblico IMPRENTAS annualità 2021-2022”

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22