Sunt intrados a sa posta cun unu mortu a bratzete cun s’idea de retirare sa pensione sua: unu fatu de non crèere chi est capitadu in Irlanda. Como sa politzia est indaghende pro chircare de atzapare sos responsàbiles.

Totu est cumentzadu chenàbura coladu a ora de sas 11: un’òmine est intradu a s’ufìtziu postale de Carlow, prus a mancu a chentu  chilòmetros dae Dublinu, e at pedidu de retirare sa pensione de unu betzu. Sos impiegados però non l’ant dadu su dinari ispieghende•li chi su titulare diat àere dèvidu èssere presente a su ritiru. In deretura s’òmine s’est torradu a presentare cun un’amigu poderende su pensionadu a bratzete. Comente sos prepostos ant bidu s’iscena ant cumpresu deretu chi su betziteddu fiat mortu. Is duos trufadores duncas si nche sunt fuidos, iscapende su mortu chi est rutu a terra che sacu bòidu.

Segundu s’Irish Independent, sos duos si sunt giustificados cun su personale narende chi su betziteddu non s’intendiat bene. “L’ant postu mallione de lana in cara, unu capeddu in conca e l’ant portadu a s’ufìtziu postale poderendelu a suta sos suercos”, at contadu unu testimòngiu. S’autopsia at bogadu a campu chi Peadar Doyle, 66 annos, fiat mortu dae una pariga de oras.

Su fatu faghet bènnere a conca unu film de sos annos Otanta, “Weekend con il morto”, ma a diferèntzia de sos protagonistas de sa pellìcula americana sos duos irlandesos sunt istados prus disfortunados e sa trampa issoro est istada iscoberta in deretura. Su sìndigu de Carlow at decraradu de èssere abarradu trèmidu cando at intesu sa noa in su telegiornale: “Non nche potzo crèere chi calicunu apat pòdidu fàghere una cosa comente a custa!”. A politzia est indaghende pro iscobèrrere sos autores de custa atzione, ma pro s’ora no at lassadu peruna decraratzione e non bi sunt indagados.

 “Progetto finanziato con l’Avviso Pubblico IMPRENTAS annualità 2021-2022”

Sas Prendas Arkeològicas de Cràbas ant a èssere sas printzipales in Danimarca.

Unu pùbbricu meda e abbizosu at pigadu parte giòvia coladu a s’Istitutu italianu de Cultura de Copenaghen a s’addobiu dedicadu a sas prendas arkeològicas de Cràbas e a su Parcu arkeològigu naturale de su Sinis, cunfirmande s’interèssu forte internatzionale pro s’istòria e s’identidade de sa
Sardigna. S’initziativa, insertada in s’abbenimentu “Sardigna: s’istòria, sa trama” e fatta gràtzias a sa collaboratzione intre assòtzios culturales e
istitutziones, at rapresentadu una occasione importante de faveddu po bandire su patrimòniu sardu in fora de s’isula.

Sa serana at postu in lughe cantu siat importante contare sa Sardigna a foras de sos assettios regionales e natzionales, non solu comente logu turìsticu ma comente logu de tziviltades antigas, de iscobertas arkeològicas de importu internatzionale e de connottos culturales ancora arradigadas in manera funguda in su presente.

Po mesu de su contu de sos logos printzipales de su Sinis, dae Tharros a sa zura arkeològiga de Mont’e Prama, passande pro museos e logos chi
rappresentant s’iscrocca, su pùblicu danesu at pòtidu cumintzare unu viàzu ideale intre coladu e presente, cumprendinde su balore universale de unu
patrimòniu chi non apartenet solu a sa Sardigna ma a totu su cadinu de su Mediterràneu.

Accanta a s’arkeologia, logu meda est bistadu dedicadu fintzas a sas issidas artìstigas de oe, dae su tzinema a sas artes immaginativas fintzas a sa
mùsica, evidentziande comente sa cultura sarda non siat un’erèntzia cristallizzada in su tempus coladu ma una realidade bìva, capatze de si rennovare e faeddare cun su presente. Custu intrizu intre istòria e moda afortigat su nuntzu de una Sardigna chi cambiat, cabosa de sas raighinas suas e a su matessi tempus aberta a su mundu.

Abbenimentos comente custu dimustrant s’importu de sa cooperatzione intre istitutziones, assòtzios culturales in su fraigare caminos de balorizatzione cumpartzidos e chi durant. Leare sa cultura sarda a su forastigu cheret nàrrere difatis afortigare sos ligàmenes cun sas comunidades internatzionales, favoressere sa connoschèntzia pare-pare e dare unu contribbudu a una diplomàtzia culturael fundada subra su rispetu e s’iscàmbiu.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”