Adiosu a sa giornalista Silvia Tortora. Si nd’est andada in una clìnica romana, a s’edade de 59 annos, una “professionista de sa veridade”, contada in televisione e in sos giornales durante sa carriera longa sua. In sas retes sotziales s’ammentu de chie, tra amigos e parentes, l’ammentat semper pro sas batallas suas e su traballu suo.

Silvia fiat fìgia de Enzo Tortora. In su coro de totus b‘est s’imàgine de su babbu chi tenet in bratzu sas duas pitzinnas suas, a pustis de su calvàriu giuditziàriu longu suo intre su 1983 e su 1986, tra su àrtzere, su tribunale e s’assolutzione dae s’acusa orrorosa de tràficu de droga e assòtziatzione camorrìstica.

Pro sos casteddajos sa figura de Enzo Tortora tenet unu balore particulare. Su giornalista famadu, unu de sos “babbos fundadores” de sa televisione italiana, aiat onoradu sa tumba de Aldo Scardella. Fintzas issu una vìtima de sa giustìtzia mala, mortu suitzida in càrtzere in su mese de trìulas de su ’86, arrestadu cun s’acusa de àere pigadu parte a s’irrobatòriu a manu armada a dannu de su “Bevimarket” de Casteddu e de sam orte de su titulare Giovanni Battista Pinna. Paritzos meses de càrtzere pro su giòvanu, 185 dies de presonia sena neghe. Posca, su gestu disperadu: Aldo fiat istadu agatadu mortu impicadu. “Bos pedo perdonu, si m’agato in custa situatzione lu depo petzi a mie etotu, apo detzìdidu de l‘agabbare. Perdonade·mi pro sos dannos chi apo causadu. Mòrgio innotzente”.

Su casu Scardella fiat arribbadu a sa risolutzione intre su 1996 e su 2002, cun s’arrestu e sa cundenna de sos culpèvoles de s‘omitzìdiu Pinna, duos nùmenes giai connotos a sas fortzas de s’òrdine chi faghiant parte de sa gasi narada “Banda de Is Mirrionis”. Su fatu aiat ispantadu totu s’opinione pùblica, giai tocada dae pretzedentes casos de errores giuditziàrios, su de Tortora prima de totu. Pròpiu issu no aiat mancadu de s’ocupare de su casu e calicuna chida a pustis de s’assolutzione sua, su 23 cabudanni 1986 aiat fatu sa prima essida pùblica sua andende a cummemorare sa tumba de Scardella, tudadu in su campusantu de San Michele de Casteddu. “Cumprendo bene ite l’at portadu a s’ochire. Est istada su disisperu, su dolore pro un’acusa ingiusta”.

 “Progetto finanziato con l’Avviso Pubblico IMPRENTAS annualità 2021-2022”

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22