Sa comunidade de Gàiru at sentidu meda s’assassìniu de su giòvanu Riccardo Muceli. Cummoventes is
faeddos de su sìndigu Lorrai in is mèdias sotziales: “Apo pèrdidu un amigu de cando fia minore.
Tristos e cummòvidos a beru is faeddos chi su primu tzitadinu de Gàiru, Sergio Lorrai, at iscritu eris in
Facebook pro sa morte mala de Muceli: «Gàiru at pèrdidu in modu crudele unu tzitadinu suo. Deo apo
pèrdidu fintzas un amigu, unu fedale. Cun issu apo coladu bona parte de sa pitzinnia mia. Custu disàura at
trèmidu meda totu sa bidda nostra».

Eris a merie, in Pelau, in su sartu de Jersu, non meda a tesu de Gàiru, Riccardo Muceli, berbegàrgiu gairesu
de 38 annos, est istadu mortu a balla dae calicunu chi fiat apostadu a costadu de su cuile suo, acanta
andaiat ogna die pro atèndere is pegos.

A bisu de is incuirentes, su pastore, a pustis de àere acabbadu de fàghere su manìgiu de corte, at sètzidu a
màchina e at mòvidu conca a bidda. Su mortore, o is mortores suos, però fiat isetende∙lu apostados a palas
de unu giassu e cando s’allevadore ddis est coladu a dae in antis ddant caladu su fogu.

Su fiorinu, oramai sena controllu, s’est prantadu in sa coleta. Su giòvanu no est mortu de repente, ma is
feridas non d’ant lassadu possibilidade de vida, mancari s’arribu de su personale de su 118 chi est istadu
avisadu dae unu passante chi, bidende sa màchina in s’oru de caminu, at pensadu a un intzidente.

In deretura ant acudidu peri is Carabineris de su Cumandu Provintziale de Nùgoro pro is rilievos tècnicos. A
pitzu de s’omitzìdiu sunt indaghende is carabineris de sa Cumpangia de Jersu, coordinados dae sa Procura
de sa Repùblica de su Tribunale de Lanusè.

Sa noa mala s’est ispainada a sa lestra in sa bidda de su Pardu e at betadu a terra a totus. Tristos is faeddos
de su sìndigu de Gàiru, Sergio Lorrai: «Gàiru at pèrdidu in modu crudele unu tzitadinu suo. Deo apo pèrdidu
fintzas un amigu de pitzinnia, unu fedale. Cun issu apo coladu bona parte de sa gioventude mia. Custu
disàura at corpidu totu sa bidda nostra. Sufro paris a sa famìlia e a totu sa comunidade gairesa pro custa
morte».

 “Progetto finanziato con l’Avviso Pubblico IMPRENTAS annualità 2021-2022”

Tesones in su Gulfu Persico, arriscant sas bendidas sardas in sos Paisos de sa zura.

Sas tesones intre s’Iran e atteros paisos de su Gulfu podent tennere effettos fintzas supra s’accolomia de sa Sardigna. Su problema no est solu po su pretziu de s’energia ma fintzas pro sas bendidas de sas dittas sardas in forastigu. Un’istudiu de Confindustria Sardigna narat chi una parte importante de su negossiu cun custos Paisos diat podere minimare.

In sos urtimos annos sos Istados chi sunt in su Gulfu Persico sunt divennidos unu de sos mercados printzipales pro sa dittas de s’isula, pustis de sos Istados Unidos e s’Ispagna. Una parte importante de sas mertzes sardas bendidas in forastigu finint propriu in cussa zura e sa parte prus manna est de produttos divressos dae su petroliu. Custu mustrat cantu su Gulfu siat unu mercadu importante pro s’accolomia regionale. Sa parte de produttos sardos pro custos Paisos est meda prus arta in cunfrontu a sa media italiana, cunfirmande chi s’isula est prus esposta de atteras regiones a sas difficultades de su negossiu in cussa zura.

Intre sos clientes printzipales bi sunt Arabia Saudita e Bahrein, sighidos dae Emirati Arabi Uniti. Fintzas su Qatar addurat unu mercadu de signifficu pro medas dittas sardas. Intre sos campos prus interessados bi sunt cussu de sa produssione industriale e cussu chimicu, chi in sos urtimos annosa ant bendidu una parte manna de sos produttos insoro in sos Paisos de su Gulfu. Unu rolu importante lu tenent fintzas sas dittas chi produent macchinarios e cussas chi tribagliant sa pedra.

Si sas tesones de sa zura diant deppere accreschere e faghere divennere prus diffitzile su negossiu, una parte de custa bendidas si diat podere minimare cun cosseguentzias pro divressas dittas de s’isula. Sas difficultades in sa colada de sas naves o problemas intre sos Istados de sa zura diant podere abbaccare su trafficu de sas mertzes e faghere divennere prus diffitziles sos negossios. Pro medas dittas sardas, custos mercados sunt divennidos in su tempus unu puntu de relata importante. Una minimada de sas bendidas diat podere duncas gravare supra sos risurtados de sas dittas e tennere effettos fintzas supra s’occupassione e sos imbestimentos.

Pro custu sa situassione in su Gulfu benit sighida cun attentzione meda fintzas in Sardigna. S’accreschimentu de sa crisi diat podere difattis influentzare non solu sos pretzios de s’energia ma fintzas sos appitzigos de sos negossios fraigados in sos annos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22