Misteru pro sa vitzenda de s’òmine iscumpartu su 5 ghennàrgiu coladu dae Barrali e agatadu mortu eris sero in su Rio Mannu.

Difatis – comente at iscritu s’Unione Sarda – in su corpus de sa vìtima, Antonangelo Lecca de 56 annos, est istada agatada una ferida suspeta in conca.

At a èssere s’autopsia a iscoviare sas càusas chi ant provocadu sa morte de Antonangelo Lecca, su disocupadu de 56 annos de Barrali chi eris a mangianu est istadu agatadu sena vida in su riu Flùmini Mannu, in su sartu de Barrali. De s’òmine, acordadu cun unu pastore, connotu pro èssere istadu denuntziadu e arrestadu pro maltratamentos in famìlia, non s’ischiat prus nudda dae su 31 de nadale. Lecca aiat una ferta manna inconca, procurada fortzis ruende a malasciagura cun sa bitzicleta, ma est possìbile chi sia istada fata peri pro more de unu corpu iscutu a posta dae calicunu. Pro s’ora sos carabineris, coordinados dae su pm Diana Lecca, pensant chi sa prima ipòtesi siat sa prus bàlida, ma sunt sighende a indagare.

Lecca biviat solu, in un’aposentu in su sartu de Barrali, in unu terrinu de propiedade sua dae cando su giùighe aiat dispostu s’istesiamentu suo dae sa domo familiare de bia Donori. S’òmine, sende chi non aiat sa patente, impreaiat pro s’ispostare una bitzicleta betza. Sos carabineris ant cumentzadu a lu chircare dae su 5 de ghennàrgiu ebbia, a pustis chi su frade Pierluigi at avisadu sos carabineris de Barrali denuntziende s’iscumparta sua. A s‘inìtziu sos familiares ant pensadu chi s’esseret istesiadu a manera voluntària. Sos carabineris ant ativadu deretu sas chircas e sàbadu sero l’ant agatadu, a pustis chi su frade Pierluigi at agatadu sa bitzicleta sua in unu cannàrgiu de riu Bau Mannu. S’abbassiada de su livellu de s’abba, favordidu dae sa serrada de sa diga a monte, at permìtidu de agatare sa bitzicleta. A pustis sa prefetura de Casteddu at aviadu totu sas protzeduras chi si sighint in sos casos de iscumparta de persones. A sas fatu su riu, ant partetzipadu sos carabineris de sa cumpangia de Partiolla coordinados dae su cumandante, su tenente Luca De le Vedove, sos vìgiles de su fogu de su distacamentu de Mandas e de su nùcleu subàcueos de su cumandu provintziale de Casteddu, e sos tècnicos ispetzialistas de su corpus natzionale de su sucursu alpinu e ispeleològicu.

Sunt istados pròpiu custos ùrtimos a individuare e recuperare su corpus chi s’agataiat in mesu a sa vegetatzione de su riu a una chimbantina de metros dae su logu acanta est istada agatada sa bitzicleta. Sa noa de s’agatamentu de su corpus est lòmpida in deretura a Barrali e una surra de persones ant acudidu a “Bau Mannu” chi ant assistidu a sa muda a sas operatziones de recùperu. Su corpus est istadu leadu a s’istitutu de meighina legale de su policlìnicu de Pauli, in ue oe s’anatomopatòlogu Roberto Demontis at a fàghere s’esàmene autòpticu chi at a crarire cun seguresa sas càusas chi ant provocadu sa morte sua.

 “Progetto finanziato con l’Avviso Pubblico IMPRENTAS annualità 2021-2022”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22